Geir: Slóvenar spila nútímahandbolta sem mér líkar

Landsliðsþjálfarinn Geir Sveinsson á von á mjög erfiðum leik gegn sterku liði Slóvena á morgun en Geir er mjög hrifinn af slóvenska liðinu.

„Eins og alltaf förum við í leikinn til að vinna. Slóvenar eru með flott lið og spila gríðarlega skemmtilegan handbolta. Þeir sýndu það í leikjunum gegn Frökkum í undirbúningi fyrir HM að þeir eru til alls líklegir. Ég held að þeir seu á pari við Spánverjana,“ segir Geir og bætir við.

„Þeir nýta sína styrkleika gríðarlega vel og spila hraðann nútímahandbolta sem mér líkar. Ég þekki miðjumanninn, Marko Bezjak, ég var að þjálfa hann hjá Magdeburg. Hann er ofboðslega hæfileikaríkur, les vel leikinn og er fljótur að átta sig á hvar veikleikarnir eru. Við þurfum að vera vel vakandi gegn honum. Örvhentu leikmennirnir eru góðir, tvær öflugar skyttur og það er í raun hvar er borið niður, þetta er þétt og flott lið.“

Eftir frábæran fyrri hálfleik í gær á móti Spánverjum þá fyllist maður bjartsýni, er það rangt mat hjá mér?

„Nei og eftir að hafa skoðað leikinn betur fannst mér fyrri hálfleikurinn og fyrstu 15 mínúturnar í seinni hálfleik mjög góðar.  Við vorum helst að klikka á því að nýta ekki færin sem við fengum. Við áttum fjögur virkilega góð færi í seinni hálfleik. Staðan er 17-15 þegar 15 mínútur eru eftir og erum þá einum manni fleiri. Kannski hefðum við getað minnkað muninn í 17-16 eða jafnað í 17-17 og þá eru 13-14 mínútur eftir og allt opið. Þess í stað missum við þá í 19-15 og þá svona misstum við trúna. 45 mínútur voru mjög flottar. Ég er búinn að sýna þeim þetta, þeir vita þetta og sáu þetta. Þeir vita hvað þeir geta og nú þurfum við að vinna í því að þetta endist út leikinn.“

Hvað er að frétta af Vigni Svavarssyni er hann á leiðinni inn í hópinn?

„Því miður veiktist Vignir, fékk slæma flensu en hann er á batavegi. Endanleg niðurstaða liggur ekki fyrir. Ég er búinn að vera í sambandi við Vigni á hverjum degi og við tökum stöðuna fljótlega hvað gerist. Við höfum haldið lausu einu sæti.

„Það eru jú 13 önnur nöfn á listanum og sumir voru valdir til þess að geta komið beint inn í mótið. Reyndir leikmenn sem áður hafa tekið þátt í móti eins og þessu og þurfa lítinn undirbúning til þess að koma inn. Við þurfum að vega og meta þetta. Ástaðan fyrir því að ég tók bara 15 leikmenn er sú að það eru bara leyfðar tvær skiptingar í keppninni. Þetta gefur manni tækifæri á þriðju skiptingunni að bíða aðeins með sextánda manninn. Kannski er þetta einhver áhætta ég veit það ekki en ég ákvað að gera þetta svona. Við tökum ákvörðun fljótlega hvort við tökum sextánda manninn inn eða höfum þetta svona áfram,“ segir Geir en Bjarki Már Gunnarsson fylgdist með úr stúkunni í leiknum gegn Spáni.

Ekki missa af neinu sem gerist á HM í Frakklandi. Vísir er með öflugt fréttateymi á mótinu sem færir ykkur allar nýjustu fréttirnar af strákunum okkar. Fylgdu okkur á Facebook, Twitter og Snapchat (sport365).