Guðjón: Ekki slæmt að gera mistök ef menn læra af þeim

Landsliðsfyrirliðinn Guðjón Valur Sigurðsson tekur nú þátt í sínu 20. stórmóti í handbolta. Guðjón Valur lék með Barcelona og hann segir þetta um mótherja kvöldsins.

„Ég met þá sem fjórða eða fimmta besta lið heims í dag. Þeir eru með mikla reynslu og kunna að spila mikilvæga leiki. Þeir eru núna að ganga í gegnum smábreytingar en með sama kjarna og undanfarin ár. Það eru ungir strákar að koma inn í liðið og Spánverjar eru með nýjan þjálfara.

Spænska liðið er hættulegt bæði í sókn og vörn. Þú verður betri þegar þú spilar við þá bestu og það er það sem við viljum. Við búum okkur undir þennan leik af fullum krafti og ætlum okkur að ná í góð úrslit.“

Hvernig koma yngri leikmennirnir inn í hópinn?

„Mjög vel og þeir eru að standa sig og gera það sem þeir eru beðnir um að gera. Þeir eru ekki bara góðir leikmenn. Sumir eru að taka sín fyrstu skref í atvinnumennsku þannig að þú setur ekki sömu kröfur á þá og leikmenn sem eru búnir að spila kannski 10 ár í atvinnumennsku. Þeir leggja sig hundrað prósent fram og það er ekki hægt að biðja menn um meira. Þeir eru góðir í hóp og framtíð þeirra er björt. Það er mikilvægt fyrir þá að komast inn á svona mót og sjá að þetta er aðeins meira en nokkrar æfingar og nokkrir leikir. Þetta er svolítið stærra og meira.

„Það er gott fyrir þá að fá að koma inná, taka ábyrgð og fá að gera mistök líka. Það er þá okkar hinna eldri að sýna þeim að það er ekkert slæmt að gera mistök maður lærir og þroskast af þeim. Mér finnst gaman að taka þátt í þessu ferli að gera menn betri.“

Hvaða tilfinningu hefur Guðjón Valur um mótið í Frakklandi?

„Voðalega litla enn þá. Við erum að koma af æfingamóti þar sem mér fannst við spila nokkuð vel. En leikurinn við Dani var auðvitað gríðalega erfiður. Við áttum ágætar síðustu 45 mínútur á móti Egyptum og lékum allt í lagi leik á móti Ungverjum. Við vonumst til þess að bæta okkar leik og ég fer bjartsýnn inn í mótið. En þetta er kannski svolítið öðruvísi en fyrir fimm til átta árum þegar við vorum með sterkasta liðið í riðlinum og það þótti sjálfsagt mál að sjá okkur í fyrsta eða öðru sæti. Það er kannski ekki þannig lengur en það er samt ekki útilokað að það geti gerst. Við tökum hvern leik fyrir sig og vonumst til þess að okkur takist að spila vel,“ segir fyrirliðinn Guðjón Valur Sigurðsson.

Ekki missa af neinu sem gerist á HM í Frakklandi. Vísir er með öflugt fréttateymi á mótinu sem færir ykkur allar nýjustu fréttirnar af strákunum okkar. Fylgdu okkur á Facebook, Twitter og Snapchat (sport365).