Þriðji sigurinn í síðustu fimm leikjum hjá Sverri Inga og félögum

Það horfir allt til betri vegar hjá Sverri Inga Ingasyni og félögum í Granada eftir þrjá sigra í síðustu fimm leikjum.

Í kvöld vann Granada 2-1 sigur á Alaves á heimavelli.

Sverrir Ingi lék allan leikinn í miðri vörn Granada sem er í fallsæti á markatölu.

Blikinn hefur spilað alla þessa þrjá sigurleiki en Granada hefur aðeins fengið á sig tvö mörk í þessum þremur leikjum.

Granada á afar mikilvægan leik fyrir höndum á laugardaginn þegar liðið sækir Leganes heim í miklum fallslag. Vinni Granada kemst liðið upp úr fallsæti.