Segir Gylfa Þór kominn á par við snillinga eins og Eið Smára og Ásgeir

Arnar Grétarsson, fyrrverandi atvinnu- og landsliðsmaður í fótbolta sem nú þjálfar Breiðablik í Pepsi-deild karla, heldur ekki vatni yfir frammistöðu Gylfa Þórs Sigurðssonar með Swansea og íslenska landsliðinu þessa mánuðina.

Gylfi Þór var allt í öllu í 2-1 sigri Íslands gegn Kósóvó síðastliðinn föstudag en hann er einnig stoðsendingahæsti leikmaður ensku úrvalsdeildarinnar með ellefu stykki. Arnar var gestur í útvarpsþættinum Fótbolti.net á X977 á laugardaginn og mærði þar Hafnfirðinginn.    

Sjá einnig:Óskar Hrafn: Guð hjálpi landsliðinu ef Gylfi Sigurðsson meiðist

„Það sem mér finnst svo frábært er að hann er svo mikill fagmaður. Þetta er gaur sem lifir fyrir fótboltann. hann setti sér það markmið sem lítill gutti að verða atvinnumaður. Hann hugsar rosalega vel um sig, æfir mikið og gerir mikið aukalega. Þetta eru engin geimvísindi. Ef þú ætlar að verða góður þá þarftu að leggja mikið á þig,“ segir Arnar.

„Það er lykilatriði að þú verður að rífa þig upp og gera þessa hluti sem flestir nenna ekki að gera. Sumir mæta bara á æfingu og gera það sem þarf að gera en Gylfi er þannig að hann gerir alltaf eitthvað aukalega.“

Á pari við þá bestu

Arnar spilaði 71 landsleik á fimmtán ára landsliðsferli og spilaði með mörgum af bestu leikmönnum Íslandssögunnar. Hann er á því að Gylfi sé á leið með að verða sá besti frá upphafi.

„Gylfi er klárlega á meðal þeirra bestu. Hann er líka svo stöðugur. Þú veist alltaf hvað þú færð frá honum og hann spilar alltaf frábærlega. Ef hann heldur svona áfram kæmi ekkert á óvart ef talað yrði um hann sem okkar besta fótboltamann,“ segir Arnar.

„Hann er kominn á par við snillinga eins og Eið Smára og Ásgeir Sigurvinsson,“ segir Arnar enn fremur.

Það sem Arnar er svo ánægður með er hversu góð fyrirmynd Gylfi Þór er. Þessi 27 ára gamli Hafnfirðingurinn reykir hvorki né drekkur og kemur vel fram allstaðar.

„Fótboltinn í dag er öðruvísi. Ef þú hagar þér eins og vitleysingur vita allir af því strax. Þú þarft að vera rosaleg fyrirmynd sem atvinnumaður í dag,“ segir Arnar.

„Sem leikmaður í ensku úrvalsdeildinni eru margar milljónir að fylgjast með þér. Það er ekki gott ef þú ert látandi eins og fífl og lætur sjá þig úti að drekka og reykja. Þú vilt hafa fyrirmyndina eins og Gylfa.“

Rosaleg viðurkenning

Aðspurður hver var besti leikmaðurinn sem hann spilaði með í íslenska landsliðinu svarar Arnar:

„Ætli maður verði ekki að segja Eiður Smári. Hann var frábær eins og pabbi sinn. Siggi Jóns var líka frábær. Það voru margir frábærir en ef maður talar bara um hrein gæði þá var Eiður með töfra og gat gert ótrúlega hluti. Eiður Smári er gaur sem hafði x-factor.“

Eiður Smári hefur náð lengst allra íslenska fótboltamanna síðustu tvo áratugina eða svo en Arnar telur að hann hefði getað gert enn meira ef hann væri líkari Gylfa.

„Ég hef séð Eið Smára æfa. Hann æfir alltaf eins og brjálæðingur en hefði hann haft það sama og Gylfi í þessu öllu hvert hann hefði hann þá getað farið? Hann fór í bestu félög heims og spilaði með Chelsea sem er ótrúlegt. Hann var ekki bara leikmaður þar heldur enn af betri leikmönnum liðsins og fer svo til Barcelona,“ segir Arnar.

„Ég held enn þá að sumir fótboltamenn hér heima átti sig ekki á hversu merkilegt það var að komast til Barcelona. Það var rosaleg viðurkenning. Að hafa náð því sýnir okkur hvar þessi drengur var á þessum tímapunkti,“ segir Arnar Grétarsson.

Þáttinn í heild sinni má heyra hér að neðan en umræðan um Gylfa Þór og Eið Smára hefst á 1:29:11