ÍR með mikilvægan sigur á Fáskrúðsfirði

ÍR-ingar ná sér í dýrmæt stig í baráttunni í neðri hluta Inkasso-deildarinnar með sigri á Leikni Fáskrúðsfirði.

Heimamenn í Leikni hefðu getað ýtt Breiðhyltingum niður fyrir sig og í fallsæti með sigri í dag, en í staðinn breikkar bilið á milli liðanna í fjögur stig.

Það var markalaust hjá liðunum í fyrri hálfleik, en Jón Arnar Barðdal braut ísinn fyrir gestina í ÍR á 53. mínútu leiksins þegar hann setur frákast eftir skot frá Hilmari Þór Kárasyni í markið.

Már Viðarsson innsiglaði svo sigur ÍR-inga með skallamarki eftir hornspyrnu Stefáns Þórs Pálssonar á 78. mínútu leiksins.

Upplýsingar um mörk og markaskorara voru fengnar frá fótbolta.net