TAU Castelló bauð Ægi velkominn á íslensku

Íslenski landsliðsbakvörðurinn Ægir Þór Steinarsson er búinn að finna sér lið á næsta tímabili en hann mun spila áfram í spænsku b-deildinni í körfubolta.

Ægir hefur samið við lið TAU Castelló en Ægir hjálpaði San Pablo Burgos að komast upp úr deildinni á nýloknu tímabili. Ægir var með 5,8 stig og 4,0 stoðsendingar að meðaltali í leik 2016-17.

Ægir er 26 ára leikstjórnandi sem er uppalinn í Fjölni þar sem hann steig sín fyrstu spor í meistaraflokki þegar hann var bara sautján ára gamall.

Ægir gekk frá sínum málum áður en hann flaug út með íslenska landsliðinu sem er að fara að taka þátt í æfingamóti í Rússlandi.

Mörg íslensk lið voru á eftir Ægi í sumar en hann ákvað að halda áfram í atvinnumennsku á Spáni þar sem hann hefur spilað undanfarin tímabil.

„Ægir er frábær leikmaður, leiðtogi inn á vellinum og getur stjórnað leikjum og flæðinu í þeim. Með hann innanborðs getum við spilað hraðan bolta en Ægir er sérstaklega hættulegur á opnum velli og öflugur einn á einn,“ sagði Antonio Ten, þjálfari TAU Castelló liðsins.

TAU Castelló endaði í fimmtánda sæti í spænsku b-deildinni á síðustu leiktíð og var tólf sætum á eftir San Pablo Burgos liðinu í vetur. Það er því mikið verk fyrir höndum ætli liðið að berjast um sæti í spænsku úrvalsdeildinni á komandi tímabili.

TAU Castelló verður þriðja liðið sem Ægir Þór spilar með í spænsku b-deildinni en vorið 2016 spilaði hann með Penas Huesca. Ægir lék einnig í tvö tímabil með Sundsvall Dragons. Þetta verður því fimmta tímabil hans í atvinnumennsku.

TAU Castelló bauð Ægi velkominn á íslensku á Twitter-síðu félagsins eins og sjá má hér fyrir neðan.

Velkominn Ægir Steinarsson! Damos la bienvenida a #TAUcastelló al base islandés

https://t.co/oEPwJFvez3

NOTICIA: https://t.co/WzXHrB1SAPpic.twitter.com/nI3G87XsFb

— TAU Castelló (@TAUcastello) August 9, 2017