Algarve-hópurinn: Berglind Björg ekki með

Freyr Alexandersson, landsliðsþjálfari kvenna í fótbolta, tilkynnti á fréttamannafundi í höfuðstöðvum KSÍ í dag hópinn sem tekur þátt í hinu árlega Algarve-móti í Portúgal.

Þetta mót er eitt sterkasta æfingamót heims á hverju ári en þarna hafa stelpurnar okkar spilað síðan árið 2007. Leikirnir eru liður í undirbúningi fyrir lokasprett undankeppni HM 2019.

Berglind Björg Þorvaldsdóttir, framherji Verona á Ítalíu, er ekki í hópnum en Guðný Árnadóttir og Hlín Eiríksdóttir, sem voru nýliðar í síðasta hóp, halda sætum sínum og fara með til Portúgal. Berglind er á milli félags þessa stundina eftir deilu við Verona.

Sigrún Ella Einarsdóttir, leikmaður Fiorentina á Ítalíu, er í hópnum en hún spilaði síðast landsleiki sumarið 2014 í undankeppni HM 2015.

Íslenska liðið er í mjög sterkum C-riðli með Evrópumeisturum Hollands, silfurliði Danmerkur og Japan sem lék til úrslita á HM í Kanada 2015.

Fyrsti leikur stelpnanna okkar verður á móti Dönum 28. febrúar en svo mætir Ísland liði Japan 2. mars áður en kemur að lokaleik riðilsins á móti Hollandi 5. mars.

Freyr Alexandersson, landsliðsþjálfari, verður ekki á hliðarlínunni í leiknum um sæti sem kemur á eftir riðlakeppninni því hann verður að mæta til Danmerkur þar sem hann er að taka UEFA Pro-leyfið. Skyldumæting er á námskeiðið og fellur Freyr ef hann fer ekki.

Íslenski hópurinn:

Markverðir:

Guðbjörg Gunnarsdóttir Djurgården

Sandra Sigurðardóttir, Val

Sonný Lára Þráinsdóttir, Breiðabliki

Varnarmenn:

Anna Björk Kristjánsdóttir, LB07

Sif Atladóttir, Kristianstad

Glódís Perla Viggósdóttir, FC Rosengård

Ingibjörg Sigurðardóttir, Djurgården

Hallbera Guðný Gísladóttir, Val

Anna Rakel Pétursdóttir, Þór/KA

Guðný Árnadóttir, FH

Selma Sól Magnúsdóttir, Breiðabliki

Miðjumenn:

Rakel Hönnudóttir, LB07

Gunnhildur Yrsa Jónsdóttir, Utah Royals

Sara Björk Gunnarsdóttir, Wolfsburg

Sandra María Jessen, Slavia Prag

Andrea Mist Pálsdóttir, Þór/KA

Andrea Rán Hauksdóttir, Breiðablik

Sigrún Ella Einarsdóttir, Fiorentina  

Sóknarmenn:

Katrín Ásbjörnsdóttir, Stjarnan

Fanndís Friðriksdóttir, Marseille

Agla María Albertsdóttir, Stjarnan

Svava Rós Guðmundsdóttir, Roa

Hlín Eiríksdóttir, Val