Trump sagður vilja gera Bandaríkin hvít aftur

Leiðtogar Demókrataflokksins deila nú hart á Donald Trump Bandaríkjaforseta vegna rasískra ummæla hans um að fjórar frjálslyndar þingkonur flokksins ættu fara frá Bandaríkjunum. Forseti fulltrúadeildar Bandaríkjaþings segir að forsetinn vilji gera „Bandaríkin hvít aftur“. Repúblikanar hafa að mestu þagað þunnu hljóði.

Þó að Trump nefndi ekki frjálslyndu þingkonur Demókrataflokksins á nafn þykir ljóst að hann hafi átt við þær Alexandriu Ocasio-Cortez,  Ayönnu Pressley, Rashidu Tlaib og Ilhan Omar. Tísti forsetinn að þær ættu að snúa aftur til „brotinna og glæpaplagaðra“ heimalanda sinna þrátt fyrir að þrjár þeirra séu fæddar í Bandaríkjunum og þær séu allar bandarískir borgarar. Aðeins Omar er fædd utan Bandaríkjanna, í Sómalíu.

„Þegar Donald Trump segir fjórum bandarískum þingkonum að fara aftur til landa sinna staðfestir hann að áætlun hans um að „Gera Bandaríkin mikil aftur“ hefur alltaf snúist um að gera Bandaríkin hvít aftur,“ tísti Nancy Pelosi, forseti fulltrúadeildar Bandaríkjaþings og leiðtogi demókrata í þinginu.

When @realDonaldTrump tells four American Congresswomen to go back to their countries, he reaffirms his plan to “Make America Great Again” has always been about making America white again.

Our diversity is our strength and our unity is our power. https://t.co/ODqqHneyES

— Nancy Pelosi (@SpeakerPelosi) July 14, 2019

Pelosi hefur átt í nokkrum deilum við frjálslyndari arm þingflokks síns þar sem þingkonurnar fjórar eru framarlega í flokki. Talið er að Trump hafi ætlað að ala enn á sundrung í röðum demókrata með tístum sínum.

Ocasio-Cortez svaraði forsetanum á Twitter og fordæmdi ummæli hans. Sagði hún Trump ekki getað ímyndað sér Bandaríkin þar sem fólk eins og hún og flokkssystur hennar séu hluti þjóðarinnar. Tlaib kallaði eftir því að Trump yrði kærður fyrir embættisbrot og Omar sakaði forsetann um að ala á hvítri þjóðernishyggju.

„Þú ert reiður yfir því að fólk eins og við þjónum á þingi og berjumst gegn hatursfullri stefnu þinni,“ tísti Omar.

You are stoking white nationalism bc you are angry that people like us are serving in Congress and fighting against your hate-filled agenda.

“America's answer to the intolerant man is diversity, the very diversity which our heritage of religious freedom has inspired.” -RFK

— Ilhan Omar (@IlhanMN) July 14, 2019

Nokkrir forsetaframbjóðendur flokksins hikuðu ekki við að kalla ummæli forsetans rasísk, þar á meðal Elizabeth Warren og Beto O‘Rourke.

„Tölum enga tæpitungu um hvað þessi fyrirlitlegu ummæli eru: rasísk og útlendingafælin árás á þingkonur demókrata,“ tísti Warren.

AP-fréttastofan segir að fáir repúblikanar hafi viljað lýsa skoðun á ummælum forsetans. Þannig hafi Mitch McConnell, forseti öldungadeildarinnar, ekki svarað beiðni um viðtal. Washington Post segir að sumir þingmenn flokksins sem hafi stundum mótmælt svæsnustu yfirlýsingum forsetans hafi ekki látið í sér heyra nú.

Let's be clear about what this vile comment is: A racist and xenophobic attack on Democratic congresswomen. This *is* their country, regardless of whether or not Trump realizes it. They should be treated with respect. As president, I'll make sure of it. https://t.co/WupieDquLA

— Elizabeth Warren (@ewarren) July 14, 2019

Kom sér á framfæri með rasískri samsæriskenningu

Þetta er fjarri því í fyrsta skipti sem Trump lætur skína í kynþáttahyggju sína. Stjórnmálaframi hans hófst með rasískri samsæriskenningu um að Barack Obama, fyrrverandi forseti, væri ekki fæddur í Bandaríkjunum og þar með ekki lögmætur forseti.

Á 9. áratugnum keypti Trump heilsíðuauglýsingar í dagblöðum til að krefjast dauðarefsingar yfir svörtum táningum sem voru sakaðir um að nauðga skokkara í Miðgarði í New York. Síðar kom í ljós að þeir höfðu verið þvingaðir til að játa á sig glæpinn. Trump hefur neitað að biðjast afsökunar á framferði sínu í því máli.

Í kosningabaráttunni árið 2016 lýsti Trump Mexíkóum almennt sem nauðgurum og glæpamönnum. Þá er hann sagður hafa lýst nokkrum Afríkuríkjum sem „skítalöndum“ á fundi með þingmönnum.

Í kjöfar samkomu hvítra þjóðernissinna, Kú Klúx Klan-liða og nýnasista í Charlottesville í Virginíu sumarið 2017 fullyrti Trump að „mjög fínt fólk“ hafi verið bæði í hópi þeirra og fólks sem mótmælti þeim. Það gerði forsetinn þrátt fyrir að nýnasisti hefði ekið bíl sínum inn í hóp mótmælenda með þeim afleiðingum að kona á fertugsaldri lést og fjöldi fólks særðist.

Fréttin hefur verið uppfærð.