Áströlsk kona sögð hafa afhöfðað móður sína

Kona hefur verið ákærð fyrir morð eftir að hafa, að því er fullyrt er, afhöfðað móður sína á meðan fjögurra ára gamall frændi þeirra fylgdist með. Frá þessu er greint á vef fréttastofu Sky.

Lögreglan hefur ekki staðfest hvaða áverka móðirin hlaut en ástralskir fjölmiðlar hafa greint frá því að hún hafi verið afhöfðuð í Sydney borg í Ástralíu á aðfaranótt sunnudags.

Brett McFadden, yfirrannsóknarlögreglumaður, lýsti aðkomunni á vettvangi sem „meðal þeirra eftirtektarverðustu og viðbjóðslegustu glæpavettvanga sem lögreglan hefur séð,“ og bætti við að áverkar á fórnarlambinu hafi verið „heilmiklir.“

Hann sagði lögregluna telja að mæðgurnar hafi rifist og hafi rifrildið orðið ofbeldisfullt. Ástralskir miðlar hafa nafngreint konuna og á hún að hafa heitið Rita Camilleri. Hún var 57 ára gömul. Lögregla hefur enn ekki staðfest þetta.

Nágrannar hennar hringdu á lögregluna á aðfaranótt sunnudags vegna láta og fannst lík móðurinnar á heimilinu og var það illa leikið.

Dóttirin var handtekin fyrir utan heimili nágranna og fjögurra ára gamli drengurinn var færður á sjúkrahús vegna smávægilegra höfuðáverka segir lögregla.

Lögreglumönnum sem unnu á vettvangi hefur verið boðin sálfræðiaðstoð.

„Rannsóknarlögreglumennirnir eru að vinna sig í gegn um öll gögnin sem við höfum en þetta mál er mjög flókið og rannsóknin erfið,“ bætti McFadden við.

„Hún er líka á frumstigi og eins og þið eflaust skiljið er enn mjög langt í land.“

Hann sagði í samtali við The Australian Broadcasting Corporation: „Við teljum á þessu stigi málsins að nokkrir hnífar hafi verið notaðir á meðan á atvikinu stóð.“

„Ég get ekki greint frá því hvers konar hnífar það voru.“

Dóttirin, sem ástralskir miðlar hafa nefnt sem Jessicu Camilleri, 25 ára, hefur komið fyrir dóm og beðið hefur verið um að heilsa hennar verði metin.

Hún sagði við dóminn að hún væri andlega veik og ætti við fleiri veikindi að stríða og bætti við: „Ég gat ekki einu sinni þvegið mér almennilega þegar ég fór í sturtu til að ná öllu blóðinu af mér.“