Fúsi og Melabúðin vildu ekkert með ASÍ hafa

Þrjár ódýrustu fiskibúðirnar eru í Hafnafirði, ef marka má nýja könnun verðlagseftirlits Alþýðusambandsins. Fjórar verslanir neituðu þátttöku í könnuninni og heimiluðu fulltrúum verðlagseftirlitsins ekki að skrá niður verð í verslunum sínum.

Af þeim verslunum sem tóku þátt í könnuninni er Litla fiskbúðin Helluhrauni sögð oftast hafa verið með lægsta verðið, eða í um helmingi tilfella. Fylgifiskar í Borgartúni voru aftur á móti oftast með hæsta verðið. Verðmunurinn reyndist auk þess nokkuð mikill, oft um 40 til 60 prósent. Í helmingi tilfella var munurinn rúmlega 60 prósent. Mesti verðmunurinn var á laxi í sneiðum, 135 prósent eða 2.238 krónu munur á kílóinu.

Rétt er þó að árétta að fjórar fiskverslanir eru sagðar hafa neitað fulltrúum ASÍ að framkvæma könnun sína; Fiskbúðin Hafberg, Fiskbúð Fúsa, Melabúðin og Fiskbúðin Vegamót. Auk þess er rétt að taka fram að ASÍ gerði aðeins beinan verðsamanburð en lagði ekki mat á gæði eða þjónustu.

Taflan hér að neðan, sem fengin er frá ASÍ, sýnir með litakóðun hvaða fiskverslanir voru með hæstu og lægstu verðin. Hæstu verðin eru rauð en þau lægstu dökkgræn. Til þess að sjá töfluna betur má jafnframt smella hér.