Kolbrún Pálína meðal reynslubolta sem misstu vinnuna

Fjölmiðlakonan Kolbrún Pálína Helgadóttir er meðal þeirra fimmtán sem misstu vinnuna hjá Árvakri, útgáfufélagi Morgunblaðsins, Mbl.is og K100 í dag. Árvakur var rekinn með 415 milljóna króna tapi í fyrra en uppsagnirnar koma í miðri kjarabaráttu blaðamanna.

Kolbrún Pálína hefur starfað í fjölmiðlum um árabil en hóf störf í fyrra í Hádegismóum sem verkefnastjóri á markaðsdeild fyrirtækisins.

Fjölmargir þeirra sem misstu vinnuna í dag hafa starfað hjá Morgunblaðinu um árabil og er óhætt að segja að stemmningin í Hádegismóum sé dauf í dag samkvæmt upplýsingum Vísis.

Fréttastofa hefur leitað viðbragða hjá Haraldi Johannessen, framkvæmdastjóra Árvakurs og ritstjóra Morgunblaðsins, og Rut Haraldsdóttir, starfandi starfsmannastjóra, vegna uppsagnanna en ekki fengið.

Emilía Björnsdóttir, yfirmaður ljósmyndadeildar, er meðal þeirra sem misstu vinnuna en hún hafði starfað hjá Morgunblaðinu frá árinu 1974. Haraldur Jónasson, reynslumikill ljósmyndari, var einnig meðal þeirra sem sagt var upp.

Stórt skarð höggvið á íþróttadeild

Reynslumiklu íþróttafréttamennirnir Guðmundur Hilmarsson, Ívar Benediktsson og Sindri Sverrisson eru sömuleiðis án vinnu eftir tíðindi dagsins.

„Fagnaði á dögunum 30 ára starfsafmæli í íþróttafréttamennskunni en þau verða ekki fleiri í bili. Eftir tæplega 20 ára starf á Mogganum fékk ég reispassann ásamt fleira fólki í dag og þar af tveir félagar mínir á íþróttadeildinni. Þessi tími er búinn að vera frábær og að vinna við að fjalla um íþróttir, sem eru mér svo kærar, hefur gefið mér mikið. Er stoltur af störfum mínum og geng frá borði beinn í baki. Vonandi tekur eitthvað skemmtlegt við,“ sagði Guðmundur í kveðjupistli á Facebook. Hann hefur skrifað íþróttafréttir í Morgunblaðið og Mbl.is.

Anna Lilja Þórisdóttir og Anna Sigríður Einarsdóttir, blaðakonur á Mbl.is, kveðja sömuleiðis Hádegismóana með söknuðu.

„Þetta hefur verið frábær tími á góðum vinnustað með góðu fólki - ég hef fengist við allt á milli himins og jarðar; skrifað innlendar og erlendar fréttir um allt mögulegt, tekið viðtöl, skrifað pistla, gert myndskeið, verið fréttastjóri og vaktstjóri, skrifað fréttaskýringar og ég veit ekki hvað og hvað,“ sagði Anna Lilja á Facebook. Hún hefur starfað í Hádegismóum í níu ár.

Engin viðbrögð frá framkvæmdastjóra

Anna Sigríður getur hugsað sér að starfa áfram við textavinnu.

„Atvinna óskast! Ég var víst í hópi þeirra starfsmanna sem sagt var upp hjá Árvakri í dag og biðla því til Fésbókarvina eftir ábendingum um áhugaverð störf. Ekki er verra ef þau fela í sér einhverja textavinnu, nú eða tengjast umhverfismálunum með einhverjum hætti.“

Anna Lilja, Anna Sigríður, Ívar, Sindri og Guðmundur voru á meðal þeirra átján vefblaðamanna Mbl.is sem gerðu alvarlega athugasemd við viðbrögð yfirstjórnar í verkfallsaðgerðum félagsmanna BÍ undanfarið.

Þá kveður Hilmar Gunnarsson sömuleiðis eftir þrettán ára starf í Hádegismóum.