PSG tilbúið að hleypa Cavani til Madridar

Ýmislegt þykir benda til þess að úrugvæski markahrókurinn Edinson Cavani verði orðinn leikmaður Atletico Madrid snemma á nýju ári en það gæti þó strandað á viðræðum PSG og Atletico.

Cavani rennur út á samningi við PSG næsta sumar og getur því farið frítt þá en PSG er tilbúið að hleypa honum burt í janúar, berist tilboð upp á 10 milljónir evra.

Samkvæmt ítalska stjörnublaðamanninum Gianluca Di Marzio hefur Atletico gengið vel í samingaviðræðum við Cavani sjálfan en ekki þykir víst að spænska félagið sé tilbúið að punga út þessum 10 milljónum evra þar sem þeir geta fengið kappann án greiðslu næsta sumar.

Hinn 32 ára gamli Cavani hefur ekki fengið margar mínútur með PSG í vetur en hann hefur skorað 196 mörk í 298 leikjum fyrir franska stórveldið síðan hann gekk í raðir þess frá Napoli sumarið 2013.