Dagskráin í dag: Rúnar Páll rifjar upp hið ótrúlega Íslandsmeistaraár og landsliðsstrákar fara yfir EM-ævintýrið

Beinum útsendingu frá íþróttaviðburðum hefur snarfækkað vegna útbreiðslu kórónuveirunnar eins og gefur að skilja. Til að mæta því hafa Stöð 2 Sport og hliðarrásir verið dagskrársettar með nýju dagskrárefni og endursýningum af safnefni til að stytta íþróttaþyrstum stundirnar.

Þjálfarinn Rúnar Páll Sigmundsson verður gestur Gumma Ben í Sportinu í kvöld þar sem hann mun fara yfir hið ótrúlega ár 2014 hjá karlaliði Stjörnunnar í fótbolta. Stjörnumenn urðu ekki aðeins Íslandsmeistarar í fyrsta sinn með hádramatískum hætti, án þess að tapa leik, heldur komust þeir í umspil um sæti í riðlakeppni Evrópudeildarinnar þar sem þeir mættu ítalska stórliðinu Inter.

Á Stöð 2 Sport verður einnig hægt að sjá oddaleik KR og ÍR um Íslandsmeistaratitilinn í körfubolta karla í fyrra, þætti um spænska fótboltann, enska bikarleiki, bikarúrslitaleik FH og Víkings R. í fyrra, og fleira til.

Stöð 2 Sport 2

Knattspyrnuhetjur framtíðarinnar verða í sviðsljósinu á Stöð 2 Sport 2 þar sem sýndir verða þættir um krakkamót síðustu ára í fótboltanum. Bein útsending verður frá PDC Home Tour pílukastmótinu og hefst hún kl. 18.30, og um kvöldið verða sýndir úrslitaleikir Ajax og Manchester United, og Chelsea og Arsenal, í Evrópudeildinni árin 2017 og 2019.

Stöð 2 Sport 3

Á Stöð 2 Sport 3 verður þáttur Gumma Ben frá árinu 2017 þar sem hann rifjar upp EM-ævintýri Íslands með þeim Gylfa Þór Sigurðssyni, Aroni Einari Gunnarssyni, Jóhanni Berg Guðmundssyni, Alfreð Finnbogasyni og Hannesi Þór Halldórssyni. Það var glatt á hjalla þegar félagarnir rifjuðu meðal annars upp sigurinn á Englendingum og furðulegar ákvarðanir enska liðsins í leiknum. Þátturinn er á dagskrá kl. 22.15 en á stöðinni verða einnig sýndir úrslitaleikir úr enska bikarnum í gegnum árin og leikur Breiðabliks og Vals í Pepsi Max-deild karla frá því í fyrra.

Stöð 2 eSport

Það verður boðið upp á keppni í FIFA 20, Gran Turismo, Valorant og League of Legends á rafíþróttastöðinni Stöð 2 eSport í dag.

Stöð 2 Golf

Á Stöð 2 Golf verða sýndir skemmtilegir viðtalsþættir David Feherty sem heimsækir ýmsa kylfinga og annað frægt fólk sem kann sitthvað fyrir sér í golfi, auk fleira efnis.

Útsendingar dagsins má finna á heimasíðu Stöðvar 2.