Dagskráin í dag: Leikurinn sem markar upphaf gullaldar KR, Sport-þættirnir, NBA og enski bikarinn

Beinum útsendingu frá íþróttaviðburðum hefur snarfækkað vegna útbreiðslu kórónuveirunnar eins og gefur að skilja. Til að mæta því hafa Stöð 2 Sport og hliðarrásir verið dagskrársettar með nýju dagskrárefni og endursýningum af safnefni til að stytta íþróttaþyrstum stundirnar.

Til viðbótar við Sportið í dag og Sportið í kvöld kennir ýmissa grasa á Stöð 2 Sport í dag. Þar verður sýnd stytt útgáfa af dramatískum leik KR og þáverandi Íslandsmeistara Njarðvíkur frá árinu 2007, við upphaf gullaldar KR-inga. Þar verða einnig sýndar perlur úr sögu úrvalsdeildar karla í fótbolta, sem og bikarúrslitaleikur karla frá síðasta ári. Þá verða sýndir sígildir leikir úr enska bikarnum í fótbolta; viðureign Leicester og Chelsea frá tímabilinu 2017-2018 og leikur West Ham og Manchester United frá tímabilinu 2015-2016, auk fleira efnis.

Stöð 2 Sport 2

NBA-deildin í körfubolta verður alls ráðandi á Stöð 2 Sport 2 í dag. Þar verða sýndir þættir um hetjur úr sögu deildarinnar, skemmtilegir þættir um 10. áratug síðustu aldar í deildinni, og fleira til.

Stöð 2 Sport 3

Á Stöð 2 Sport 3 verða sýndir leikir úr úrslitakeppni Domino‘s-deildar karla í körfubolta frá síðustu árum, meðal annars fjórði leikur Hauka og KR í úrslitaeinvíginu 2016 og lokaleikurinn í úrslitaeinvígi Tindastóls og KR ári fyrr.

Stöð 2 eSport

Á rafíþróttastöðinni Stöð 2 eSport verður leikur TILT og RAFÍK Í 4. umferð Vodafone-deildarinnar, en áður verður sýndur leikur FH og TILT í 3. umferð. Einnig verður vináttulandsleikur Íslands og Rúmeníu í FIFA sýndur.

Stöð 2 Golf

Þættir um The Open og frammistöðu Tiger Woods á The Players árið 2001 eru meðal þess efnis sem verður í boði á Stöð 2 Golf í dag.

Allar útsendingar dagsins má finna á heimasíðu Stöðvar 2.