Umfjöllun: Celtic - KR 6-0 | KR sá aldrei til sólar í Skotlandi

KR tapaði stórt gegn Celtic ytra í kvöld í forkeppni Meistaradeild Evrópu í knattspyrnu. Lauk leiknum með 6-0 sigri heimamanna sem var síst of stór þó svo að Pálmi Rafn Pálmason hafi komið knettinum yfir línuna aðeins til að sjá flaggið á lofti.

Heimamenn voru mikið mun betri aðilinn frá fyrstu mínútu og voru komnir yfir eftir aðeins sex mínútna leik. Markið full einfalt en miðvörðurinn Christopher Jullien lyfti boltanum þá úr öftustu línu yfir vörn KR-inga á Mohamed Elyounoussi – lánsmann frá Southampton – sem tók við knettinum á ferðinni, fór fram hjá Beiti Ólafssyni í marki KR og renndi honum í autt markið.

Odsonne Edouard tvöfaldaði svo forystu heimamanna rúmum tíu mínútum síðar en Celtic spilaði sig vel upp hægra megin og Hatem Abd Elhamed gaf fyrir. Edouard náði skoti af stuttu færi sem hefði eflaust farið í belginn á Beiti ef ekki hefði verið fyrir Arnór Svein Aðalsteinsson. Fór tuðran af ristinni á miðverði KR og í netið. Staðan orðin 2-0 og leikurinn svo gott sem búinn.

Jullien skoraði svo þriðja mark heimamanna með skalla eftir hornspyrnu Ryan Christie þegar hálftími var liðinn. Celtic fékk hornið eftir góða sókn þar sem Kristinn Jónsson bjargaði með frábærri tæklingu.

Eftir þriðja markið varði Beitir nokkrum sinnum áður en Kristján Flóki Finnbogason fékk eina alvöru færi KR-inga. Sending upp hægra megin og Kristján Flóki náði fínu skoti í fjærhornið en Vasilios Barkas varði vel í marki heimamanna.

Það tó Celtic innan við mínútu að skora eftir að síðari hálfleikur hófst. Greg Taylor skallaði þá háloftabolta Elhamed í netið en Taylor var einn og óvaldaður á fjærstöng þegar Elhamed lyfti boltanum inn á teig.

Edouard bætti við sínu öðru marki og fimmta marki heimamanna á 72. mínútu og var það líklega flottasta mark leiksins. Fór hann illa með Arnór Svein og Finn Orra Margeirsson í aðdraganda marksins áður en hann renndi knettinum fram hjá Beiti.

KR-ingar sóttu þó í sig veðrið í síðari hálfleik og hélt Pálmi Rafn Pálmason að hann hefði skorað þegar skammt var til leiksloka er hann skallaði boltann í netið en Pálmi Rafn var aðeins fyrir innan og rangstaða dæmd. 

Skömu síðar komst Pablo Punyed í fínt færi en varnarmenn Celtic björguðu.

Elyounoussi bætti svo við sjötta markinu þegar komið var fram yfir venjulegan leiktíma með góðu skoti af stuttu færi eftir sendingu Taylor frá vinstri. Lokatölur því 6-0 og KR dottið út úr Meistaradeild Evrópu. Liðið fer hins vegar í forkeppni Evrópudeildarinnar og verður spennandi að sjá hverjir mótherjar KR verða þar.