Kim grét, baðst afsökunar og sýndi ný vopn

Kim Jong Un, einræðisherra Norður-Kóreu, táraðist og baðst hann afsökunar á þeim harðindum sem þegnar hans hafa þurft að ganga í gegnum að undanförnu. Hann sagðist ekki hafa staðið undir því trausti sem honum hafi verið veitt og sagði að honum þætti það leitt.

Þetta sagði einræðisherrann í ræðu sem hann hélt um helgina til að marka 75 ára afmæli Verkamannaflokks Norður-Kóreu. Sérfræðingar segja ræðuna til marks um að einræðisstjórn Kim sé undir þrýstingi, samkvæmt frétt Guardian.

Í ræðu sinni sendi Kim blendin skilaboð til nágranna sinna í suðri og umheimsins.

Einræðisherrann hét því að halda þróun og framleiðslu kjarnorkuvopna áfram og stærði sig af þeirri nútímavæðingu sem herafli Norður-Kóreu hafi fengið.

Í kjölfar ræðunnar var haldinn skrúðganga þar sem ný vopn og búnaður hermanna voru til sýnis auk nýrrar gerðar langdrægrar eldflaugar. Sérfræðingar segja að gífurlega stór hluti gjaldeyris Norður-Kóreu hafi farið í þróun kjarnorkuvopna og eldflauga á undanförnum árum.

Markmið viðskiptaþvingana Sameinuðu þjóðanna gegn Norður-Kóreu er að miklu leyti ætlað að draga úr aðgangi Kim og ríkisstjórnar hans að peningum og svelta þannig kjarnorkuvopnaáætlun ríkisins.

Aðgerðirnar hafa þó komið verulega niður á íbúum Norður-Kóreu og hagkerfi. Faraldur nýju kórónuveirunnar hefur einnig gert það en tekjur ríkisins vegna ferðamanna frá Kína hefur dregist verulega saman hans vegna. Þar að auki hafa náttúruhamfarir eins og fellibyljir komið verulega niður á landbúnaðargetu landsins.

Þjóðaröryggisráð Suður-Kóreu fundaði um ræðu Kim og lýsti yfir áhyggjum af nýju eldflauginni sem var sýnd í skrúðgöngunni. Eins og bent er á í frétt Yonhap fréttaveitunnar, þá er raunveruleg geta kjarnorkuvopna og eldflauga Norður-Kóreu óljós.

Ríkið hefur áður sýnt nýjar eldflaugar sem ekkert hefur orðið úr og ósamræmi er í öðrum yfirlýsingum frá Norður-Kóreu. Forsvarsmenn ríkisins segjast til að mynda hafa uppgötvað hvernig minnka á kjarnorkuvopn svo hægt sé að koma þeim fyrir í langdrægum eldflaugum. Það er þó ekki nóg að minnka vopnin heldur þurfa þau einnig að þola gífurlega mikinn þrýsting, hita og titring sem myndi myndast við endurkomu vopnsins inn í gufuhvolf jarðarinnar.

Embættismenn í Suður-Kóreu segja það þó jákvætt að Kim hafi í ræðu sinni heitið því að nota kjarnorkuvopn eingöngu í varnarskyni.

Áhyggjur af eldflaugum

Það sem vakti einnig áhyggjur meðal ráðamanna í Suður-Kóreu voru þær fjölmörgu skammdrægu eldflaugar sem voru til sýnis í skrúðgöngunni. Þær væri hægt að nota til að gera árásir á skotmörk í Suður-Kóreu og án nokkurs fyrirvara.

Sérfræðingar sem blaðamenn Reuters ræddu við segja ljóst að langdrægu eldflaugunum hafi verið ætlað að senda skilaboð til Bandaríkjanna. Þeim skammdrægu var þó ætlað að senda skilaboð til Seoul.

Norður-Kórea hafi haldið þróun þeirra eldflauga áfram, samhliða þróun langdrægra eldflauga. Undanfarið ár virðist sem sérstök áhersla hafi verið lögð á þróun skammdrægra eldflauga og hafi fjölmargar tilraunir verið gerðar.

„Norður-Kórea sýndi hvernig ríkið hefur lagt áherslu á þróun vopna til að ráðast á Suður-Kóreu á meðan okkar fólk hefur lagt alla áherslu á friðarviðræður,“ sagði Chun Yung Woo, fyrrverandi samningamaður Suður-Kóreu.