Fróaði sér fyrir utan sól­baðs­stofu

Karlmaður hefur verið dæmdur í 60 daga skilorðsbundið fangelsi fyrir kynferðisbrot með því að hafa berað og handleikið kynfæri sín í vitna viðurvist, fyrir utan sólbaðsstofu í júlí á síðasta ári. Dómurinn féll 30. október síðastliðinn í Héraðsdómi Reykjavíkur.

Í dóminum er vísað til skýrslu lögreglunnar af málinu. Þar segir að starfsmaður sólbaðsstofunnar hefði haft samband við lögregluna, þar sem fyrir utan glugga stofunnar hefði maðurinn staðið og fróað sér, beint fyrir framan sæti hennar við afgreiðsluborðið. Starfsmaðurinn gat lýst manninum og þekkti nafn hans, en hann var nýkominn úr ljósatíma á sólbaðsstofunni þegar atvikið átti sér stað. Hann var farinn af vettvangi á reiðhjóli þegar lögreglu bar að garði.

Lögregla stöðvaði manninn stuttu síðar. Þá kvaðst hann hafa verið að koma af sólbaðsstofunni, en neitaði því að hafa verið að fróa sér, heldur kvaðst hann hafa verið að klóra sér í pungnum vegna húðsjúkdóms sem valdi kláða. Maðurinn var handtekinn og færður á lögreglustöð, þar sem hann blés í áfengismæli sem sýndi 2,35‰.

Í niðurstöðu dómsins segir að framburður starfsmannsins sé skýr og trúverðugur, auk þess sem framburður vitnis, sem mætti starfsmanninum í miklu uppnámi í kjölfar atviksins, styðji við hann.

Þá liggur fyrir myndskeið úr eftirlitsmyndavélum sólbaðsstofunnar af því hvar maðurinn stendur við glugga stofunnar, setur hönd inn um buxnaklauf sína og tekur getnaðarliminn út.

Maðurinn var eins og áður sagði dæmdur til 60 daga skilorðsbundinnar fangelsisvistar, sem fellur niður að tveimur árum liðnum, haldi hann skilorð. Við ákvörðun refsingar hafði áfengisástand mannsins ekki áhrif. Hins vegar var litið til þess að starfsmaðurinn sem brotið beindist gegn var ung stúlka og að háttsemi mannsins hafði mikil áhrif á hana.

Manninum var einnig gert að greiða verjanda sínum málsvarnarlaun sem námu 607.910 krónum, auk þess sem hann þurfti að greiða 39.343 krónur í annan sakarkostnað.