2 dagar í Ungverjaleik: Eina mark Guðna í 80 landsleikjum kom gegn Ungverjum

Guðni Bergsson, formaður KSÍ lék á sínum tíma áttatíu A-landsleiki á nítján árum þar af þrjátíu þeirra sem fyrirliði. Hann var bara einu sinni á skotskónum í þessum leikjum og það var á móti Ungverjum á Laugardalsvellinum árið 1995.

Í dag eru tveir dagar í úrslitastund hjá strákunum okkar í karlalandsliðinu í fótbolta en 12. nóvember næstkomandi kemur í ljós á Ferenc Puskás leikvanginum í Búdapest hvort það verður Ungverjaland eða Ísland sem spilar í lokakeppni Evrópumótsins í sumar. Leikur verður í beinni á Stöð 2 Sport og spennan magnast með hverjum deginum. Vísir heldur áfram að telja niður í leikinn.

Guðni Bergsson skoraði sitt eina landsliðsmark á móti Ungverjum í sínum 62. landsleik sem fór fram á Laugardalsvellinum 11. júní 1995. Guðni var þarna á sínu þriðja ári sem fyrirliði liðsins en hann hafði þarna spilað meira en sextíu landsleiki án þess að skora.

Guðni spilaði auðvitað í vörninni og var því ekki oft með í sókninni. Í þessum leik á móti Ungverjum fyrir meira en aldarfjórðungi síðan þá fór hann hins vegar fram í einu horna íslenska liðsins.

Hornspyrna Rúnars Kristinssonar fór á kollinn á Ólafi Adolfssyni sem skallaði en varnarmenn Ungverja komust fyrir boltann. Hann barst aftur á móti til Guðna sem sendi hann í boga í slána og niður. Guðni var líka fljótur á fætur og skallaði hann til öryggis yfir marklínuna en boltinn var þó líklega farinn inn áður en kom að því.

„Ég hélt að boltinn væri inni þegar ég skallaði en það var gaman að Guðna skyldi loks takast að skora. Það var gott að vinna þetta, sérstaklega þar sem við lentum undir. Mér fannst þetta fyllilega sanngjarn sigur," sagði Ólafur Adolfsson við DV eftir leikinn.

Guðni fagnaði markinu vel sem jafnaði metin í 1-1 á 61. mínútu eftir að Ungverjar höfðu verið yfir í leiknum í fjörutíu mínútur. Sigurður Jónsson skoraði síðan sigurmark íslenska liðsins aðeins sex mínútum síðar.

„Nú er öllum skotum frá félögunum lokið hér með. Það var erfitt að ná þessum bolta inn en það tókst. Ég fann á mér að ég myndi skora í þessum leik eins og Þorgrímur Þráinsson vinur minn spáði svo réttilega í DV. Við vorum aðeins slegnir eftir að Ungverjarnir skoruðu en við vorum betri aðilinn allan leikinn og eftir að við skoruðum var þetta aldrei spurning," sagði Guðni Bergsson í viðtali við DV eftir leikinn.

Guðni skoraði reyndar ekki aftur fyrir íslenska landsliðið þótt að hann kæmist nálægt því á móti Ungverjum í Búdapest nákvæmlega fimm mánuðum síðar. Guðni átti þá skalla í stöng í stöðunni 0-1 fyrir Ungverjaland. Ungverjar lönduðu aftur á móti sigrinum og enduðu þar með þriggja leikja taphrinu á móti Íslandi.

Leikur Ungverjalands og Íslands verður sýndur í beinni útsendingu á Stöð 2 Sport 2 fimmtudaginn 12. nóvember klukkan 19.45 en upphitun hefst klukkan 18.45. Áskrift er hægt að kaupa hér en einnig verður í boði að kaupa stakan viðburð á myndlyklum Vodafone og Símans á kr. 990, sem og í vefsjónvarpi Stöðvar 2.