Fleiri starfsmenn á Landakoti reyndust smitaðir

Alls hafa fjórir starfsmenn á öldrunarspítalanum Landakoti greinst með Covid-19 sjúkdóminn. Þetta staðfestir Már Kristjánsson, yfirmaður smitsjúkdómadeildar Landspítalans í samtali við Vísi.

Landspítalinn bannaði í gær frekari innlagnir á Landakoti eftir að smit greindust bæði í starfsmönnum og sjúklingi. Þá lá ekki fyrir ákvörðun um hvort eða hvernig starfsemi á spítalanum yrði skert frekar.

„Það hefur komið á daginn að það eru fleiri starfsmenn smitaðir og við erum að halda áfram með þetta fyrirkomulag sem við settum í gær. Við lokðum fyrir innlagnir og það voru einhverjir sem fóru heim til sín í sóttkví,“ segir Már.

Þeir sem eru smitaðir séu komnir heim til sín í einangrun.

Til skoðunar er hvort fleiri sjúklingar hafi smitast. Ekki sé vitað af fleirum.

„Ekki umfram þennan eina sjúkling sem okkur er kunnugt um en markmið okkar er að ganga úr skugga um hvort svo er eða ekki.“