Augað afmyndað og Steinunn er á mjög sterkum verkjalyfjum

Svava Kristín Grétarsdóttir og sérfræðingar hennar í Seinni bylgjunni fóru yfir meiðsli Steinunnar Björnsdóttur í leik Fram og FH í Olís deild kvenna í handbolta um síðustu helgi.

„Þetta virðist ekki vera mikið en svo þegar við skoðum þetta betur þá fylgir hendin eftir. Hún hitti Steinunni það illa að þetta er mjög alvarlegt,“ sagði Svava Kristín Grétarsdóttir þegar þær hófu umræðu sína um meiðslin og sýndi atvikið þegar skothendi FH-ingsins Britney Cots fór í höfuð Steinunnar.

„Eins og sést þarna þá er hún bara blind. Hún hélt að augað á sér væri lokað en það var í raun og veru opið. Hún fer beint upp á spítala og endar þar á að fá morfín. Hún hittir þar bæði augnlækni og lýtalækni. Hún er í stöðugu eftirliti. Hún þarf núna að hvíla í tíu til tólf daga og má mjög lítið gera eða hreyfa sig,“ sagði Sunneva Einarsdóttir, sérfræðingur Seinni bylgjunnar.

Sunneva vissi meira um líðan Steinunnar: „Hún er kvalin og er á mjög sterkum verkjalyfjum. Það er ekki vitað með sjónina og hvað verður. Hvort hún muni fá hundrað prósent sjón aftur? Eins og staðan er núna þá sér hún allt í móðu. Þetta verður erfitt,“ sagði Sunneva.

„Ég sá einhverjar myndir og augað er bara afmyndað,“ sagði Svava Kristín Grétarsdóttir.

„Það er stokkbólgið og hún getur ekki opnað það. Svo blæddi líka og það var ekki vitað hvort að augnlokið hefði sprungið undan þrýstingi eða hvort að Britney hafi farið með nöglina í augnlokið. Augnlokið sprakk og þetta var ekki gott. Hún missir alla vega af næstu tveimur leikjum,“ sagði Sunneva en það má sjá þetta í myndbandinu hér fyrir neðan.