Verjandinn segir Gunnar Jóhann í skýjunum

„Þetta er léttir eftir alla sorgina að hafa misst bróður sinn. Hann upplifir nú að honum sé trúað að um hræðilegt óhapp hafi verið að ræða. Hann viðurkenndi mikið gáleysi en þetta er niðurstaða sem hann getur lifað við,“ sagði Brynjar Meling, verjandi Gunnars Jóhanns, í samtali við iFinnmark.

Naumur meirihluti áfrýjunardómstóls í Noregi komst í gær að þeirri niðurstöðu að þrettán ára fangelsisdómur yfir Gunnari Jóhanni skyldi mildaður í fimm ára dóm. Gunnar hefur þegar verið í tvö ár í gæsluvarðhaldi og getur sótt um reynslulausn eftir rúmt ár.

Saksóknari hefur til skoðunar hvort dómnum í gær verði áfrýjað til Hæstaréttar.

Forsaga málsins

Það var í apríl 2019 sem Gunnar Jóhann læsti sig inni á heimili Gísla Þórs Þórarinssonar hálfbróður síns og beið eftir honum. Þegar Gísli kom heim kom til átaka sem lauk með því að tveimur skotum úr byssu Gunnars Jóhanns.

Annað skotið fór í Gísla en hitt í stofuvegginn. Ástæða ágreiningsins var sú að Gísli Þór var farinn að slá sér upp með barnsmóður Gunnars Jóhanns.

Gunnar Jóhann hefur frá upphafi haldið því fram að um slysaskot væri að ræða og aldrei verið ásetningur hans að bana bróður sínum. Saksóknari ákærði hann fyrir manndráp og fékk Gunnar þrettán ára dóm í héraði á þeirri forsendum. Áfrýjunardómstóll komst svo að þeirri niðurstöðu í gær að um manndráp af gáleysi hefði verið að ræða.

Situr sáttur af sér dóminn

Björn Andre Gulstad, einn verjanda Gunnars Jóhanns, bendir á að niðurstaðan sé í samræmi við frásögn Gunnars Jóhanns frá upphafi.

„Skjólstæðingur minn er í skýjunum yfir að frásögn hans frá fyrsta degi hafi að lokum verið tekin trúarleg. Hann hefur alltaf haldið því fram að skotið hafi hlaupið af fyrir slysni í átökum, ekki hafi verið um viljaverk að ræða,“ segir Guldstad.

„Hann hefur séð eftir viðbrögðum sínum og að hann hafi ýtt undir hættuna á að slys gæti gerst. Hann hefur sagt að um slys hafi verið að ræða en hefur viljað axla ábyrgð á atvikinu. Hann situr sáttur af sér fangelsisdóm fyrir aðild sína að slysinu.“

Rúmt ár í beiðni um reynslulausn

Guldstad segir Gunnar Jóhann líta svo á að hann hafi verið sýknaður af manndrápi.

„Nú getur líf skjólstæðings míns haldið áfram, fyrir utan að hann mun aldrei gleyma slysinu sem varð. Það mun fylgja honum út lífið sem og söknuður bróður sem hann elskaði af öllu hjarta.“

Gunnar Jóhann hefur setið inni 677 daga í gæsluvarðhaldi sem svarar til tæplega tveggja ára. Gunnar getur sótt um reynslulausn þegar hann hefur setið af sér tvo þriðju dómsins.

Refsiramminn fyrir manndráp af gáleysi í Noregi er sex ára fangelsi. Þar sem Gunnar játaði var dómurinn styttur um fimmtán prósent og niðurstaðan fimm ára fangelsi.

Skaðabótakröfu hafnað

Mettte Yvonne Larsen, lögmaður sem gætti hagsmuna barnsmóður Gunnars Jóhanns og kærustu Gísla Þórs hélt uppi kröfu um skaðabætur til hennar enda hefði hún missti fyrirvinnu sína, Gísla Þór.

Byggði hún á því að í raun hefðu þau Gísli Þór hafið sambúð þegar atvikið varð. Áfrýjunardómstóllinn féllst ekki á þá kröfu og sýknaði Gunnar Jóhann af skaðabótakröfunni.

„Við erum ánægðir að einkabótakröfunni hafi verið hafnað,“ segir Brynjar Meling, verjandi Gunnars Jóhanns, við iFinnmark.