Ein­vígið fer fram á Spáni

Kórónuveirufaraldurinn hefur áfram að hafa gífurleg áhrif á knattspyrnuleiki um allan heim. Í dag staðfesti knattspyrnusamband Evrópu, UEFA, að báðir leikir Chelsea og Porto í átta liða úrslitum Meistaradeildarinnar yrðu leiknir á Ramón Sánchez Pizjuán-vellinum í Sevilla á Spáni.

Er það heimavöllur spænska úrvalsdeildarfélagsins Sevilla en félagið datt út gegn Borussia Dortmund í 16-liða úrslitum keppninnar og völlurinn því laus báða dagana sem Chelsea og Porto mætast.

Fyrri leikur liðanna fer fram miðvikudaginn 7. apríl og er titlaður sem heimaleikur Porto. Sá síðari fer fram sex dögum síðar eða á þriðjudeginum 13. apríl og er titlaður sem heimaleikur Chelsea.

Þó báðir leikirnir fari fram á hlutlausum velli munu útivallarmörk gilda ef til þeirra kemur. UEFA hefur ekki gefið annað í skyn og þá hafa önnur einvígi í bæði Meistaradeild og Evrópudeild verið leikin á hlutlausum völlum.

Sigurvegarinn úr rimmu Chelsea og Porto mun mæta annað hvort Real Madrid eða Liverpool í undanúrslitum keppninnar.