NBA dagsins: Golden State vann næstbesta lið deildarinnar þrátt fyrir kaldan Curry

Golden State hefur unnið fjóra leiki í röð en tveir síðustu sigrarnir hafa komið gegn liðunum með besta árangurinn í NBA, Utah Jazz og Phoenix. Með sigrinum á Utah á mánudaginn tryggði Golden State sér sæti í umspili um sæti í úrslitakeppninni.

Curry, sem hefur verið óstöðvandi undanfarnar vikur og er stigahæsti leikmaður NBA, var kaldur í skotunum fyrir utan í nótt líkt og gegn Utah. Curry hitti aðeins úr einu af ellefu þriggja stiga skotum sínum og endaði með 21 stig.

Sem betur fer fyrir Golden State átti Andrew Wiggins stórleik og skoraði 38 stig úr aðeins 24 skotum. Hann tók einnig sjö fráköst.

Draymond Green heldur áfram að spila vel og var með þrefalda tvennu; ellefu stig, tíu fráköst og ellefu stoðsendingar. Þá stal hann boltanum fjórum sinnum.

Phoenix var sterkari framan af leik og náði mest sextán stiga forskoti. En Golden State var sterkari á svellinu undir lokin. Curry fór langt með að klára leikinn þegar hann setti niður gríðarlega erfitt skot þegar 46 sekúndur voru eftir. Jordan Poole setti svo niður tvö vítaskot og Golden State fagnaði sex stiga sigri, 122-116.

Í spilaranum hér fyrir neðan má sjá brot úr leikjum Golden State og Phoenix, Charlotte Hornets og Denver Nuggets og Los Angeles Lakers og New York Knicks auk flottustu tilþrifa leikja næturinnar.

NBA er á Stöð 2 Sport en upplýsingar um útsendingar má finna hér. NBA körfuboltinn er hluti af Stöð 2 Sport erlent sem kostar 3.990 krónur á mánuði en einnig má kaupa útsendingar sem stakan viðburð á 990 krónur.