„Spennandi dæmi, með lagfæringum hér og þar“

Ólafur tók á ný við FH í lok júní eftir að Logi Ólafsson hætti. Liðið var þá þegar svo gott sem úr leik í titilbaráttunni í Pepsi Max-deildinni, með 11 stig eftir níu leiki, 12 stigum á eftir toppliði Vals.

Undir stjórn Ólafs gekk FH ívið betur að hala inn stigum en liðið endaði þó í 6. sæti deildarinnar. Á lokakaflanum fengu margir ungir leikmenn að svamla um í djúpu lauginni en Ólafur lítur þó ekki svo á að eftir mikla gullöld sé nú tími uppbyggingar hjá FH. Stefnan sé alltaf sett á toppinn.

„Mér fannst þetta góður tími sem við áttum seinni part sumars og mér fannst þetta spennandi dæmi, með lagfæringum hér og þar. Ef það gengur í gegn er ég sáttur,“ segir Ólafur um ástæður þess að hann ákvað að vera áfram með FH-liðið.

„Við vorum orðnir fínir í endann á mótinu. Það voru litlir hlutir sem þurfti að lagfæra og í heildina var ég þokkalega ánægður með þetta,“ segir Ólafur.

Ánægður með ungu mennina en spurning hvernig þeir höndla pressu

Baldur Logi Guðlaugsson og Ólafur Guðmundsson, báðir 19 ára, urðu fljótt byrjunarliðsmenn hjá Ólafi og þeir Oliver Heiðarsson (20 ára) og Logi Hrafn Róbertsson (17 ára) spiluðu einnig mikið. Í lokaumferð mótsins, í 1-1 jafntefli við KA, komu níu FH-ingar við sögu sem fæddir eru á þessari öld.

„Ég er ánægður með það hvernig þessir ungu leikmenn komu inn í liðið. Þeir sýndu og sönnuðu fyrir okkur og ekki síst sjálfum sér að þeir eiga fína framtíð fyrir sér sem fótboltamenn, hjá FH. Ég er ánægður með það,“ segir Ólafur sem er þó ekki í brúnni hjá FH bara til að gera unga leikmenn betri heldur til að gera atlögu að titlum:

„Það er eitt að spila leiki þar sem er ekki mikið undir, og ekki mikil pressa á mönnum, eða leiki þar sem pressan er mikil allt í kringum þig. Það var ekki mikil pressa á okkur seinni part sumars. En þeir [ungu leikmennirnir] stóðu sig vel í þeim leikjum sem þeir spiluðu og svo eigum við eftir að sjá hvernig þeir bregðast við. Að sjálfsögðu er FH klúbbur sem stefnir á að vera við toppinn, það verður engin breyting á því.“

Starfar á ný með Sigurbirni

Ólafur var með Davíð Þór Viðarsson sér til aðstoðar í sumar en þeirra samstarfi er lokið og allt útlit fyrir að þeir Ólafur og Sigurbjörn Hreiðarsson, sem síðast stýrði Grindavík, starfi saman á ný:

„Það er ekki fullfrágengið en ég vonast til þess að það gangi upp núna mjög fljótlega. Við tókum sameiginlega ákvörðun um að Bjössi kæmi inn í þetta. Það var mjög gott að vera með Davíð og okkur gekk mjög vel saman og áttum fínt samstarf. Hann er í þungu námi og hefur kannski ekki alveg þann tíma sem til þarf nákvæmlega núna, og eftir samtöl komumst við að þessari niðurstöðu.“

Taka stöðuna varðandi Hjört Loga og Pétur

Ljóst er að Guðmann Þórisson verður ekki áfram í liði FH. Þrír leikmenn til viðbótar eru án samnings eftir tímabilið. Stendur til að semja aftur við Hjört Loga Valgarðsson, Pétur Viðarsson og Morten Beck?

„Þetta eru hlutir sem við erum að skoða þessa dagana. Morten Beck fer til Danmerkur. Við þurfum að taka stöðuna varðandi hina og sjá hvernig landið liggur. Við þurfum styrkingar hér og þar, og það er eitthvað sem við erum að skoða núna, í tengslum við það hvaða leikmenn við eigum og eru að koma upp hjá okkur. Við erum bara að fara yfir það núna og það er ekkert í hendi,“ segir Ólafur og heldur spilunum að sér.