Vildi beita ráðuneytinu til að halda völdum eftir kosningar

Þessari ætlun sinni sagði Trump frá á fundi í Hvíta húsinu þann 3. janúar, samkvæmt nýrri bráðabirgðaskýrslu frá öldungadeild Bandaríkjaþings. Joe Biden tók við embætti þann 20. janúar. New York Times sagði fyrst frá skýrslunni í dag.

Trump byrjaði fundinn á því að segja við Jeffrey Rosen, sem var þá starfandi dómsmálaráðherra, með því að segja: „Eitt sem við vitum er að þú, Rosen, munt ekki gera neitt til að snúa kosningunum.“ Það er samkvæmt Rosen sjálfum og Richard Donoghue, næstráðanda hans, en við tóku þriggja tíma deilur sem enduðu á því að Trump hætti við að skipta Rosen út fyrir Jeffrey Clark.

Þriggja tíma deilur

Clark hafði gert Trump ljóst að hann myndi rannsaka linnulausar og jafnframt innihaldslausar dylgjur þáverandi forsetans og bandamanna hans um að umfangsmikið kosningasvindl hefði kostað hann sigur í kosningunum sem haldnar voru í nóvember 2020.

Hann hafði einnig rætt við Trump hvernig hann hefði getað haldið völdum. Þá er Clark sagður hafa hótað og þvingað Rosen til að senda bréf til ráðamanna í Georgíu, þar sem því var ranglega haldið fram að Dómsmálaráðuneytið hefði komist á snoðir um ósamræmi í kosningunum í ríkinu.

Clark reyndi að fá Rosen og Donoghue til að senda bréfið einnig til ráðamanna í öðrum ríkjum þar sem Trump-liðar höfðu varpað fram ósönnum fullyrðingum um kosningarnar. Því neituðu þeir og við það reiddist Trump mjög.

Trump var reiður Rosen

Samkvæmt frétt Washington Post hafði Rosen um nokkuð skeið neitað að verða við kröfum Trumps um að rannsaka margar ásakanir Trump-liða. Hann sagði að ráðuneytið myndi bara rannsaka trúverðugar ásakanir.

Áðurnefnd skýrsla var unnin af Demókrötum í dómsmálanefnd öldungadeildarinnar. Í tilkynningu segir Richard J. Durbin, formaður nefndarinnar, að skýrslan sýni hve nálægst því Bandaríkin voru að lenda í mikilli stjórnarskrárkrísu og að þökk sé dyggum starfsmönnum Dómsmálaráðuneytisins hafi Trump ekki tekist að nota það í persónulegum tilgangi. Þó hann hafi reynt.

Þann 18. desember var haldinn annar fundur í Hvíta húsinu sem hefur verið lýst sem þeim „brjálaðasta“ i forsetatíð Trumps.

Birtu eigin skýrslu

Repúblikanar, sem eru í minnihluta, birtu einnig skýrslu í dag þar sem þeir segja Trump ekkert rangt hafa gert. Hann hafi hlustað á ráðgjafa sína og hætt við að skipta Rosen út. Þeir segja einnig að lygar Trump-liða um kosningarnar hafi verið réttmætar.

Clark hefur enn ekki viljað ræða við meðlimi nefndarinnar en þeir hafa beðið lögmannasamtök District of Columbia, sem veita lögfræðingum leyfi í Washington DC, um að rannsaka Clark fyrir meint agabrot.

Barr beitti sér einnig

Þingmennirnir komust einnig að því að William Barr, fyrrverandi dómsmálaráðherra, krafðist þess að starfsmenn ráðuneytisins rannsökuðu ásakanir um kosningsvik jafnvel eftir að aðrir rannsakendur höfðu sagt ásakanirnar rangar. Meðal annars eina frá Rudy Giuliani, fyrrverandi borgarstjóra New York og fyrrverandi lögmanni Trumps, sem sagðist hafa undir höndum myndband sem sýndi Demókrata reka eftirlitsaðila Repúblikanaflokksins frá kjörstað í Georgíu og troða kjörseðlum í kjörkassa.

Innanríkisráðherra Georgíu hafði áður skoðað myndbandið og sagt Giuliani hafa rangt fyrir sér.

Í byrjun desember, skömmu áður en hann sagði af sér, sagði Barr opinberlega að Dómsmálaráðuneytið hefði engar sannanir fundið fyrir umfangsmiklum kosningasvikum sem hefðu skipt máli í kosningunum.

Eftir það var Trump sagður reiður Barr og neitaði hann að segja að hann bæri enn traust til Barr.

Sjá einnig: Dómsmálaráðherrann hættir skömmu fyrir embættistöku Bidens

Þá tók Rosen við sem starfandi dómsmálaráðherra.

Á fundinum í Hvíta húsinu þann 3. janúar, sögðu Rosen og Donoghue, auk annarra yfirmanna Dómsmálaráðuneytisins sem voru á fundinum, að þeir myndu allir segja af sér. Þeir sögðu einnig að líklega myndu fleiri starfsmenn ráðuneytisins segja af sér og sömuleiðis saksóknarar og aðrir.

Samkvæmt skýrslunni sagði Pat Cipollone, æðsti lögmaður Hvíta hússins, að hann myndi einnig segja af sér. Næstráðandi hans var sammála. Að endingu, eftir þriggja tíma fund, ákvað Trump að reka Rosen ekki úr embætti.