Útilokar að ágallarnir leiði til alþingiskosninga á landsvísu

Í þeim átta kærum sem hafa borist vegna meðferðar kjörgagna í Norðvesturkjördæmi kemur meðal annars fram að:

• Kjörgögn voru ekki innsigluð
• Varsla og eftirlit kjörgagna milli talninga er talið ónægt
• Endurtalning atkvæða hófst án allra umboðsmanna
• Mismunandi niðurstaða var milli fyrri og síðari talningar 

Hafsteinn Þór Hauksson dósent í lögfræði var í dag kallaður fyrir undirbúningskjörbréfanefnd og beðinn um álit á þessum ágöllum.

„Ég held að það eitt að innsiglun atkvæða hafi ekki verið fullnægjandi leiði ekki sjálfkrafa til þess að það þyrfti að ógilda kosningarnar,“ segir hann.

Það sama eigi við um framkomna ágalla sem snerti umboðsmenn.

„Ég myndi ekki ganga svo langt að segja að það eitt að einhver umboðsmaður hafi ekki verið boðaður í seinni talninguna í þessu tilviki að það leiði sjálfkrafa til ógildingar,“ segir hann.

Hafsteinn segir að Stjórnlagaþingskosningarnar hafi á sínum tíma verið dæmdar ógildar vegna ýmissa ágalla, einkum tveggja. Hvort það eigi við um þessar kosningar sé erfitt að dæma um.

„Það hvort þeir ágallar sem hafa verið ræddir varðandi talningu í Norðvesturkjördæmi dugi í þessu sambandi veit ég ekki því ég þekki ekki nægilega vel málavöxtu. Það á eftir að rannsaka þetta mál,“ segir hann.

Hafsteinn segir mikilvægt að kjörbréfanefndin rannsaki alla anga málsins.

„Ég sé í sjálfu sér ekkert því til fyrirstöðu að þingið sjálft  rannsaki kjörgögn en fái líka gögn frá lögreglu,“ segir hann.

Hann telur þó útilokað að niðurstaða Alþingis verði að kosningarnar í heild verði dæmdar ólöglegar.

„Ég held að íslensk lög séu alveg skýr um það þetta myndi ekki leiða til nýrra kosninga um allt land,“ segir Hafsteinn að lokum.

Vonar að fleiri kjósendur kæri kosningarnar

Tveir almennir borgarar hafa kært Alþingiskosningarnar. Sigurður Hr. Sigurðsson, varaformaður Stjórnarskrárfélagsins, er annar þeirra. Hann ræddi við fréttastofu í beinni útsendingu í kvöldfréttum Stöðvar 2 í kvöld.

„Það er engin góð lausn á þessu vandamáli og krafan mín gengur út á það að það verði kosið upp á nýtt. Ég er að benda á það að þetta er eiginlega stjórnskipuleg krísa sem við erum í, því það gengur ekki að nýkjörnir Alþingismenn eigi að dæma sjálfir um eigið kjörgengi. Það er því miður þannig í stjórnarskránni og hefur verið síðan 1874 og þess vegna sitjum við í þessari stöðu. En ég er með varakröfu og það er að kjósa uppkosningu í Norðvesturkjördæmi, kjördæminu mínu“

Sigurður segist vita til þess að tveir kjósendur til viðbótar hyggist kæra kosningarnar, og vonar að þeir verði fleiri. Hann er þó hæfilega bjartsýnn.

„Það er mitt kalda mat að þetta fari eftir flokkspólitískum línum. Það eru Alþingismenn sem eiga að greiða atkvæði og ég er hræddur um að það endi þannig. En þetta fer kannski líka til Mannréttindadómstóls Evrópu að lokum, vonandi.“

Hinn borgarinn sem hefur kært kosningarnar er Þorvaldur Gylfason hagfræðiprófessor.