Sakar Maradona um að hafa nauðgað sér þegar hún var sextán ára

Álvarez gaf skýrslu hjá argentínska dómsmálaráðuneytinu síðustu viku og greindi svo frá ásökunum sínum á blaðamannafundi í Búenos Aíres. 

Álvarez sagðist hafa kynnst Maradona þegar hann var í meðferð á Kúbu 2001. Þá var hún sextán ára en hann í kringum fertugt. Álvarez sagði að Maradona hefði nauðgað sér á meðferðarstofu í Havana þegar móðir hennar var í herberginu við hliðina á. Móðir hennar var einnig í meðferð á þessum tíma.

„Hann hélt um munninn á mér og nauðgaði mér. Ég vil ekki hugsa of mikið um þetta. Ég hætti að vera stelpa, öllu sakleysinu var rænt frá mér,“ sagði Álvarez. Hún sagði að skömmu eftir þetta hafi þau farið saman til Argentínu.

Álvarez hafði áður sagt að sambandið hafi verið með samþykki beggja aðila en Maradona hafi allavega einu sinni þvingað sig til kynmaka.

Að sögn Álvarez neyddist fjölskylda hennar til að samþykkja sambandið, þrátt fyrir aldursmuninn, vegna vinskapar Maradonas og Fidels Castro, þáverandi forseta Kúbu.

Matías Morla, lögmaður Maradonas meðan hann var á lífi, hefur ekki tjáð sig um ásakanir Álvarez. Sömu sögu er að segja af kúbverskum yfirvöldum.

Maradona lést 25. nóvember í fyrra, sextugur að aldri. Hann er jafnan talinn einn besti fótboltamaður allra tíma.