Davíð B. Gíslason látinn

Davíð gegndi trúnaðarstörfum fyrir HSÍ um árabil. Hann var formaður laganefndar HSÍ og í stjórn sambandsins sem varaformaður þess frá 2013. Davíð sat í laganefnd ÍSÍ frá 2017 og var formaður þeirrar nefndar frá 2019.

Davíð lék með meistaraflokki Gróttu allan sinn feril, ef frá eru talin tvö tímabil sem hann var í herbúðum Fram. Þá lék hann með öllum yngri landsliðum Íslands. Davíð sat um tíma í stjórn handknattleiksdeildar Gróttu.

Davíð greindist með illkynja krabbamein í heila fyrir um ári síðan. Hann fór í erfiðar meðferðir gegn meininu, bæði geisla- og lyfjameðferðir, en þær báru ekki tilætlaðan árangur. Um miðjan janúar var svo ákveðið að hætta meðferðinni.