Samkvæmt úttekt L´Équipe er Sara 16. launahæsti leikmaður frönsku deildarinnar ásamt samherja sínum hjá Lyon, Eugénie Le Sommer, og Marie-Antoinette Katoto, leikmanni Paris Saint-Germain.
Í úttekt L´Équipe kemur fram að Sara sé með um átján þúsund evrur í mánaðarlaun. Það gerir rúmlega 2,5 milljónir íslenskra króna. Tólf leikmenn Lyon eru með hærri mánaðarlaun en Sara.
Lyon og PSG eru langbestu og stærstu liðin í Frakklandi og það sést á listanum yfir launahæstu leikmenn frönsku deildarinnar. Tuttugu efstu á launalistanum koma frá Lyon og PSG, fjórtán frá fyrrnefnda liðinu og sex frá því síðarnefnda.
Wendie Renard, fyrirliði Lyon, og Kadidiatou Diani, leikmaður PSG, eru launahæstar í frönsku deildinni með 37 þúsund evrur í mánaðarlaun hvor. Norska markadrottningin Ada Hegerberg hjá Lyon kemur næst með 35 þúsund evrur í laun á mánuði.
Tuttugu launahæstu leikmenn frönsku deildarinnar samkvæmt L'Équipe
- Kadidiatou Diani (PSG) - 37.000 evrur
- Wendie Renard (Lyon) - 37.000 evrur
- Ada Hegerberg (Lyon) - 35.000 evrur
- Amel Majri (Lyon) - 32.000 evrur
- Delphine Cascarino (Lyon) - 30.000 evrur
- Griedge Mbock Bathy (Lyon) - 28.000 evrur
- Grace Geyoro (PSG) - 26.000 evrur
- Sakina Karchaoui (PSG) - 25.000 evrur
- Dzsenifer Marozsán (Lyon) - 25.000 evrur
- Amandine Henry (Lyon) - 23.000 evrur
- Kadeisha Buchanan (Lyon) - 23.000 evrur
- Daniëlle van de Donk (Lyon) - 20.000 evrur
- Christine Endler (Lyon) - 19.000 evrur
- Lindsey Horan (Lyon) - 19.000 evrur
- Catarina Macario (Lyon) - 19.000 evrur
- Sara Björk Gunnarsdóttir (Lyon) - 18.000 evrur
- Eugénie Le Sommer (Lyon) - 18.000 evrur
- Marie-Antoinette Katoto (PSG) - 18.000 evrur
- Keira Hamraoui (PSG) - 17.000 evrur
- Ashley Lawrence (PSG) - 15.000 evrur
Eftir rúmlega árs fjarveru vegna barneigna sneri Sara aftur á völlinn þegar Lyon vann Dijon, 0-3, í frönsku úrvalsdeildinni á föstudaginn. Lyon er með þriggja stiga forskot á toppi deildarinnar.
Sara og stöllur hennar sækja Juventus heim í fyrri leik liðanna í átta liða úrslitum Meistaradeildar Evrópu í kvöld.
Langt frá körlunum
Þótt Sara leiki með einu besta, ef ekki besta, kvennaliði í heimi eru laun hennar langt frá því að vera sambærileg við launahæstu atvinnumenn Íslands.
Ef marka má úttekt L'Équipe eru árslaun Söru rúmlega 31 milljón króna. Til samanburðar voru árslaun Gylfa Þórs Sigurðssonar hjá Everton í fyrra um 750 milljónir króna, þrátt fyrir að hafa ekkert spilað á þessu tímabili vegna gruns um kynferðisbrot gegn barni. Þetta kom fram í Viðskiptablaðinu.
Jóhann Berg Guðmundsson, leikmaður Burnley, var næstlaunahæstur íslenskra atvinnumanna með fimm hundruð milljónir króna í árslaun.
