Handbolti

Íslandsmeistararnir unnu nauman sigur og toppliðið valtaði yfir botnliðið

Hjörtur Leó Guðjónsson skrifar
KA/Þór vann góðan sigur gegn HK í dag.
KA/Þór vann góðan sigur gegn HK í dag. Vísir/Hulda Margrét

Tveir leikir voru á dagskrá í Olís-deild kvenna í handbolta í dag. Íslandsmeistarar KA/Þórs unnu þriggja marka sigur gegn HK, 26-23, og topplið Fram vann afar sannfærandi 18 marka sigur gegn botnliði Aftureldingar.

Gestirnir í HK byrjuðu vel gegn Íslandsmeisturunum og skoruðu fyrstu þrjú mörk leiksins. HK-ingar héldu forystunni lengst af í fyrri hálfleik, en þegar gengið var til búningsherbergja var staðan 13-14, HK í vil.

Mikið jafnræði var með liðunum í síðari hálfleik, en heimakonur í KA/Þór náðu loks þriggja marka forskoti þegar rúmar fimm mínútur veru til leiksloka. Það forskot létu þær aldrei af hendi og unnu að lokum góðan sigur, 26-23.

Martha Hermannsdóttir og Rakel Sara Elvarsdóttir voru markahæstar á vellinum í dag með sjö mörk hvor fyrir norðankonur. Elna Ólöf Guðjónsdóttir var atkvæðamest í liði HK með sex mörk úr jafn mörgum skotum.

Það var heldur minni spenna í Mosfellsbænum þar sem Afturelding tók á móti Fram. Heimakonur skoruðu eitt mark á fyrstu tíu mínútum leiksins og þegar flautað var til hálfleiks var staðan 9-21.

Framkonur héldu áfram að auka forskot sitt í síðari hálfleik og unnu að lokum 18 marka sigur, 38-20.

Steinunn Björnsdóttir og Þórey Rósa Stefánsdóttir skoruðu sex mörk hvor fyrir Fram og Katrín Helga Davíðsdóttir sjö fyrir Aftureldingu.

Olísdeildirnar í handbolta eru á Stöð 2 Sport en upplýsingar um útsendingar má finna hér. Olísdeildin er hluti af Stöð 2 Sport Ísland sem kostar 3.990 krónur á mánuði.

Olís-deild kvenna KA Þór Akureyri Fram HK

Mest lesið


Fleiri fréttir

Sjá meira


×

Mest lesið