„Fólk fer heim af vaktinni með nagandi sam­visku­bit og eftir­sjá“

Landspítalinn hefur undanfarið varað við miklu álagi á bráðamóttökunni í Fossvogi og í síðustu viku var biðlað til lítið slasaðra og veika að leita annað. Staðan virðist ekki hafa batnað en í gær greindi bráðahjúkrunarfræðingurinn Soffía Steingrímsdóttir að hún hafi ákveðið að segja upp vegna ástandsins.

Jón Magnús Kristjánsson, fyrrverandi yfirlæknir bráðamóttökunnar, segir stöðuna mjög sorglega þar sem hann hefur séð eftir mjög mörgum góðum samstarfsaðilum. Vandinn sé þó ekki nýr af nálinni en hann sagði sjálfur upp í fyrra, að hluta til vegna álags.

„Það hefur lengi verið látið vita af miklu álagi á bráðamóttökunni en með vaxandi flótta frá deildinni þá verður ástandið sífellt erfiðara og meira álag á þeim sem að eftir eru,“ segir Jón. „Þetta verður ákveðinn vítahringur sem erfitt er að brjótast út úr.“

Í færslu á Facebook síðu sinni í dag vísaði Jón til þess að nokkrir hjúkrunarfræðingar hefðu fengið nóg og sagt upp störfum, þar á meðal Soffía. Að sögn Jóns hafa einstaklingar sagt upp störfum yfir langt tímabil á bráðamóttökunni vegna álags og þannig hefur smám saman starfsfólki fækkað í öllum starfstéttum.

Hann bendir á að um leið og álagið eykst, þá eykst umtalið og upplifir starfsfólk ekki bráðamóttökuna sem eftirsóknarverðan vinnustað. Líkt og aðrir finni starfsfólkið vel fyrir því að ekki sé verið að veita þá þjónustu sem þarf.

„Fólk fer heim af vaktinni með nagandi samviskubit og eftirsjá yfir því að hafa ekki getað sinnt hinum eða þessum nægilega vel, og þetta nagar fagfólk að innan eins og það myndi gera í hverri annarri stétt. Yfir tíma þá leiðir þetta bara til vanlíðanar, depurðar og jafnvel kulnunar í starfi,“ segir Jón.

Að sögn Jóns er rót vandans sú að Ísland hefur orðið eftir á með uppbyggingu þjónustu við aldraða. Það skapi meðal annars álag á bráðamóttökuna þar sem fólk kemst ekki þaðan á legudeildir vegna fólks sem að getur ekki útskrifast á spítalanum í önnur úrræði. Þá bendir hann á að um 80 rúm séu lokuð á spítalnum vegna skorts á starfsfólki og 30 einstaklingar fastir á bráðamóttökunni.

Í grunninn telur Jón að það þurfi að ráðast í heildstæðar aðgerðir til að leysa vandann, opna í kringum fimm hundruð hjúkrunarrými á höfuðborgarsvæðinu á næstu árum, byggja upp betri heimaþjónustu og gera þjóðarátak í samfélaginu um kjarabætur heilbrigðisstarfsfólks.

„Við getum leyst úr þessum vanda, þetta er ekki innbyggður ómöguleiki. En þetta verður erfitt og þetta mun kosta peninga og þetta mun taka tíma,“ segir Jón. „Þessi vandi er ekki vandi bráðamóttökunnar. Þessi vandi er vandi heilbrigðiskerfisins og þjóðfélagsins, og við verðum bara veikara þjóðfélag fyrir vikið.“

„Þegar öllu er á botninn hvolft þá er þetta eitthvað sem við verðum að leysa úr, við vitum hvernig þjóðfélag við viljum hafa, við vitum hvernig heilbrigðiskerfi við viljum hafa. Nú verðum við að taka okkur saman og vinna saman í því að leysa þetta og það er alveg hægt,“ segir hann enn fremur.