Vill vægari kröfur um gæslu­varð­hald

„Já, við höfum verið að tala um það að við gætum verið að miða okkar heimildir við það sem gerist annars staðar og það gæti hjálpað okkur mikið í þessum rann­sóknum,“ segir Halla Berg­þóra Björns­dóttir, lög­reglu­stjóri á höfuð­borgar­svæðinu.

„Því að þetta er mikil vinna við að vera að endur­nýja úr­skurði og fleira þannig að það gæti hjálpað.“

Og hvaða heimildir eru það sem þér finnst þið þurfa í málum sem þessum?

„Það er kannski lenging á gæslu­varð­haldinu, það er bara 12 vikur, og svo jafn­vel mætti skoða það að við þyrftum ekki að biðja um gæslu­varð­hald alveg strax. Að við gætum haldið fólki sér­stak­lega ef við erum með svona flóknar rann­sóknir,“ segir Halla Berg­þóra.

Stærsta fíkniefnamál Íslandssögunnar en aðeins brot af því sem er í umferð

Lögreglan boðaði til blaðamannafundar í dag til að fara yfir tvær rannsóknir sem hún hefur staðið að; annarri síðan árið 2020 en hinni í nokkra mánuði. Málin eru nátengd - í öðru þeirra var lagt hald á mesta magn fíkniefna í einu og sama málinu í sögu lögreglunnar. Í hinu var svo lagt hald á fimm kíló af amfetamíni til viðbótar, sem er talið koma frá hópnum í fyrri rannsókninni. Þar er einnig umfangsmikið peningaþvætti til rannsóknar. 

Lögreglan sagði á fundinum í dag að hóparnir stofnuðu löglegan rekstur til að þvætta peningana, oft í veitingabransanum eða í byggingariðnaðinum.

10 hafa verið handteknir vegna málanna tveggja, allt Íslendingar, og sitja þrír þeirra í gæsluvarðhaldi. Tengsl þessara mála og manna eru flókin og það er þetta flækjustig í skipulagðri glæpastarfsemi sem lögreglustjóranum finnst kalla á auknar heimildir lögreglu til að taka á þeim.