Tveir handteknir vegna hnífaslagsmála í nótt

Þetta kemur fram í dagbók lögreglu en þar segir jafnframt að mennirnir hafi notað hnífana til að ógna hvor öðrum, þeim hafi ekki verið beitt. Mennirnir hafi verið með minniháttar áverka eftir slagsmáli en eftir hnefa þeirra. 

Talsvert var  um að vera hjá lögreglunni í gærkvöld og í nótt en alls komu sautján verkefni inn á borð lögreglunnar frá klukkan fimm, síðdegis í gær. Á sjöunda tímanum var tilkynnt um innbrot í bílskýli í Breiðholti en munir höfðu verið teknir úr bifreið í því. 

Ökumaður var handtekinn vegna gruns um akstur undir áhrifum fíkniefna í Hálsahverfi en hann reyndist auk þess sviptur ökuréttindum. Einn var þá kærður fyrir hraðakstur á Ártúnshöfða. Sá var tekinn á 83 kílómetra hraða þar sem hámarkshraði er 60. 

Annar var handtekinn í Breiðholti fyrir ofsaakstur en sá hafði ekið á umferðarmannvirki og stungið af. Maðurinn reyndist hafa verið mjög ölvaður og gistir fangageymslur þar til hægt verður að ræða við hann. Annar var handtekinn í Foldahverfi fyrir ölvunarakstur. 

Þá var maður handtekinn fyrir fíkniefnaakstur í miðborginni á þriðja tímanum í nótt. Hann er nú í haldi lögreglu þar sem hann var með lyfseðilskyld lyf á sér sem hann getur ekki gert grein fyrir og var með hníf í fórum sínum. Stuttu síðar lagði lögregla hald á rafvopn, fíkniefni og hnífa á heimili í Hafnarfirði og telst mál það upplýst.

Einn er í haldi vegna innbrots á Smiðjuvegi í Kópavogi á fimmta tímanum í nótt. Maðurinn reyndist vopnaður og með fíkniefni í sínum fórum ásamt ýmsum munum sem talið var vera þýfi. Líklegt er talið að hann hafi farið inn í nokkrar bifreiðar á svæðinu í nótt áður en hann var handtekinn og látið greipar sópa. 

Fram kemur í dagbók lögreglu að fimm gisti fangageymslur og beri sumir ábyrgð á fleiru en einu broti sem upp eru talin hér að ofan.