Pólverjar um þriðjungur útskriftarnema frá Fisktækniskólanum

Fisktækniskóli Íslands í Grindavík fagnar því um þessar mundir að tíu ár eru liðin frá því hann tók formlega til starfa. Skólinn hefur útskrifað 600 nemendur frá upphafi á fimm námsbrautum en á fimmtudag var metfjöldi útskrifaður eða fimmtíu og sex. Af þeim voru 18 Pólverjar.

Írena Ríkharðsdóttir hóf nám fyrir þremur árum og útskrifaðist af tveimur brautum.

„En ég er byrjuð á þeirri þriðju sem er fiskeldi. Ég er mjög ánægð með skólann. Kennararnir eru svo góðir og útskýra vel. Það er mjög gott samkomulag kennara og nemenda. Mér finnst þetta mjög góður skóli og mæli með honum,“ segir Írena glöð í bragði en hún hefur sótt skólann frá Kópavogi þar sem hún býr.

Justyna Gronek var að ljúka námi í gæðastjórnun en hún hefur starfað sem gæðastjóri hjá fiskvinnslufyrrtækinu Vísi í Grindavík. Hún vinnur nú hjá Marine Collagen.

„Mér finnst gaman að fá tækifæri til að þróa sig og mennta sig. Mér finnst það geggjað.“

Hafðir þú eitthvað unnið í fiski í Póllandi áður en þú komst til Íslands?

„Nei aldrei. Ég byrjaði að vinna í fiski hér á Íslandi og sé mikla framtíð í þessu starfi,“ sagði Justyna sem hyggur á frekara nám en vonast einnig til að fá áfram starf sem tengist náminu.

Skólinn gat boðið upp á kennslu í pólsku en stelpurnar segja einnig mikilvægt að ná tökum á íslenskunni þótt hún geti reynst erfið.

„Fyrir mig já. Þetta var ekki auðvelt. Nei, nei, alls ekki,“ segir Justyna og hlær.

„Já, það var erfitt í byrjun. En ég er með mikið af góðu fólki í kringum mig, íslenska vini mína. Þau hjálpa mér og byggja mig upp til að tala meira. Allt í lagi að gera villur, þetta kemur, þarf bara tíma. Þau hjálpa mér og byggja mig upp,“ bætir Írena við.

Já, útskriftarnemar voru greinilega ánægðir með námið og hópuðust að kennurum og skólameistara að athöfn lokinni til að þakka fyrir sig. Eins og parið Bartosz Hawlena-Krezeminski og Dagmara Jelonek.

Ólafur Jón Arnbörnsson skólameistari skólans frá upphafi segir Dagmara reyndar haft mjög góða menntun þegar hún hóf nám við skólann og fengið vinnu hjá Marel að námi loknu.

„Hann kom fyrst og svo kom hún. Hún í fisktækni og hann í fiskeldi,“ segir Ólafur Jón stoltur af nemendum sínum. Bartosz hyggur á frekara nám.

„Ég er kannski að hugsa um háskólann á Hólum,“ segir hann.

Ólafur Jón segir einstök námskeið hafa áður verið kennd á ensku og túlkar hjálpað til á tælensku og fleiri tungumálum.

„En þegar við vorum með svona stóran hóp Pólverja og höfðum aðgang að mjög öflugum og góðum starfsmanni í Moniku sem er starfsmaður hjá okkur og hafði áður verið túlkur og hefur tekið grunnnámið. Þá var næsta skref að kenna bara á pólsku,“ segir skólameistarinn.

Þótt ferðaþjónustan sé orðin aðalatvinnuvegur þjóðarinnar skiptir sjávarútvegurinn enn þá miklu máli. Bæði sem atvinnugrein og gjaldeyrisöflun. Tæknin í sjávarútveginum er orðin allt önnur og meiri en hún var fyrir örfáum árum. Til að vinna í háþróaðri fiskvinnslu eins og hjá Vísi í Grindavík þarf menntað starfsfólk.

Hafþór Guðmundsson rekstrarstjóri Vísis segir fimm starfsmenn fyrirtækisins hafa útskrifuðust frá Fisktækniskólanum á fimmtudag

Hvernig er samsetningin á fólki hjá þér miðað við þjóðerni?

„Mest Pólverjar, svolítið um Rúmena og mjög fáir Íslendingar. Við kæmust varla af án þeirra í þessari atvinnugrein. Þau eru jafn mikilvæg og við og eru flest orðin Íslendingar. Hafa verið hérna lengi,“ segir Hafþór. Algengt sé að fyrst komi einn eða tveir úr fjölskyldu til landsins og fleiri ættingjar og vinir fylgi þeim síðan til landsins seinna.