Dæmdu fyrrum fyrirliða landsliðsins í lífstíðarbann

Sýrlenska knattspyrnusambandið tók þá ákvörðun að dæma Al-Saleh í lífstíðarbann eftir að hann réðst á dómara í leik í efstu deild í Sýrlandi.

Hinn 33 ára gamli Al-Saleh er fyrrum fyrirliði sýrlenska landsliðsins en hann gjörsamlega trompaðist í leik Al-Jaish á móti Al-Wathba á föstudaginn var.

Al-Saleh fékk rauða spjaldið í leiknum og eftir það réðst hann á dómarann, sparkaði í hann, móðgaði hann og hrækti á hann.

Leikmenn úr báðum liðum þurftu að halda aftur af honum svo hann gengi ekki enn lengra.

Al-Saleh lék alls 56 landsleiki fyrir Sýrland frá 2008 til 2019.

Sýrlenska knattspyrnusambandið sagði frá því í dóm sínum að Al-Saleh hefði haldið áfram að móðga dómarann í búningsklefanum eftir leik.