Vilja sund­lauga­menningu og laufa­brauðs­gerð á lista UNESCO

Ísland er aðili að samningi UNESCO um varðveislu óáþreifanlegs menningararfs. Menningar- og viðskiptaráðuneytið lét vinna skýrslu um hvernig skyldi standa að tilnefningu til skráar um slík verðmæti.

Helstu niðurstöður skýrslunnar eru að laufabrauðagerð og sundlaugamenning séu verðugt framlag Íslands til hennar. Lilja Alfreðsdóttir, menningar- og viðskiptaráðherra, kynnti minnisblað um tillögu þess efnis, að því er segir í tilkynningu á vef stjórnarráðsins í dag.

Lagt er til að vinna við undirbúning tilnefninganna verði hafin sem fyrst eftir verkáætlun frá Stofnun Árna Magnússonar í íslenskum fræðum. Ráðinn verður sérfræðingur til þess að vinna áfram að tilnefningunum til UNESCO samkvæmt minnisblaðinu.

Á meðal þess sem er á lista UNESCO yfir óáþreifanlegan menningararf mannkyns er argentínskur og úrúgvæskur tangó og finnska gufubaðsmenningin.