FCK í bikarúrslit eftir ótrúlegan markaleik en Silkeborg féll úr leik

Um var að ræða seinni leiki liðanna í undanúrslitum. Nordsjælland vann 3-2 sigur í fyrri leiknum og einvígið því galopið fyrir leikinn í dag. 

Og leikurinn fór heldur betur fjörlega af stað. Viktor Claesson kom FCK yfir strax á 7. mínútu með skallamarki eftir sendingu Mohammed Daramy en Ernest Nuamah jafnaði metin úr vítaspyrnu sex mínútum síðar. Claesson var svo aftur á ferðinni á 16. mínútu og kom FCK þá í 2-1 og fimm mínútum síðar skoraði Jordan Larsson þriðja mark FCK eftir sendingu Claesson. Staðan í hálfleik 3-1 og FCK í góðri stöðu.

Þegar Denis Vavro kom FCK í 4-1 á 62. mínútu voru einhverjir búnir að afskrifa Nordsjælland. Þeir gáfust hins vegar ekki upp. Jacob Christiansen minnkaði muninn í 4-2 á 66. mínútu og Wahid Faghir skoraði svo þriðja mark gestanna á 71. mínútu og allt jafnt í einvíginu.

Aðeins sjö mínútum síðar fékk FCK hins vegar víti. Á punktinn steig Diogo Goncalves og hann tryggði FCK sæti í úrslitaleiknum. Lokatölur 5-3 í frábærum markaleik.

Hákon Arnar Haraldsson lék allan leikinn í liði FCK og nældi sér í gult spjald í uppbótartíma. Ísak Bergmann Jóhannesson kom inn á 86. mínútu.

Í hinum leik liðanna var einvígið sömuleiðis galopið eftir 1-1 jafntefli Álaborgar og Silkeborg í fyrri leiknum. Álaborg vann hins vegar öruggan 4-1 sigur í dag og tryggði sér sæti í úrslitum. Gestirnir frá Silkeborg skoruðu reyndar fyrsta mark leiksins en heimaliðið svaraði með tveimur mörkum fyrir hlé og leiddi 2-1 í hálfleik.

Í síðari hálfleik bættu leikmenn Álaborgar síðan við tveimur mörkum og unnu öruggan sigur og tryggðu sér sæti í úrslitaleiknum gegn FCK en hann fer fram 18. maí.