Leita réttar síns vegna fram­komu lög­reglu á Ljósa­nótt

Sautján ára drengur sem lagði leið sína á bæjarhátíðina Ljósanótt í Reykjanesbæ með vini sínum segir ferðina hafa breyst í martröð. Samkvæmt drengnum, sem er dökkur á hörund, og móður hans veittist lögreglan að honum á harkalegan hátt við komuna á hátíðina á meðan vinur hans var látinn afskiptalaus.

Mæðginin vildu ekki koma fram undir nafni en fannst mikilvægt að deila reynslu sinni í von um að sagan endurtaki sig ekki. Drengurinn segir atvikið hafa átt sér stað skömmu eftir komuna á hátíðina. Þar hafi þeir vinirnir labbað fram hjá lögreglumönnum. 

„Við erum bara að labba fram hjá. Lögreglan labbar að mér og spyr hvað ég heiti og ég bara hvað er í gangi og svara því. Næsta spurning, ertu efnaður eða ertu með vopn á þér. Ég ætlaði að sýna þeim hvað ég var með í vasanum og þá segja þau ekki setja hendur í vasann og ég spyr hvað er í gangi og svo segir hún mér að fara upp við vegg og nær í hund og lætur leita á mér og enginn er að tala við hinn vin minn sem er ekki með sama húðlit og ég,“ útskýrir drengurinn. 

Hrein og bein kynþáttamörkun

Eftir þetta hafi kvöldinu verið lokið og þeir vinirnir hafi snúið aftur heim. Móðirin segir að sér hafi verið brugðið þegar sonur hennar hringdi og lýsti atvikum. Tilfinningin hafi ekki verið góð og aðgerðir lögreglu hafi verið hrein og bein kynþáttamörkun. 

„Líka bara í mínu uppeldi hef ég alltaf lagt áherslu á að kenna börnunum mínum að löggan sé vinur þeirra. Ég er á móti því þegar fólk talar um lögregluna sem grýlu og hef alltaf sagt þeim ef eitthvað kemur upp á þá talarðu við lögregluna. Lögreglan er vinur þinn. Þarna eru þeir að bregðast þessu trausti svolítið að barnið mitt geti treyst þeim,“ segir móðirin. 

Á ekki að viðgangast

Drengurinn segir atvikið hafa verið leiðinlegt og að honum hafi eðlilega brugðið. „Ástæðan fyrir því að ég er hér er að koma skilaboðunum áleiðis að þetta á ekki að vera í gangi árið 2023,“ segir hann. 

Lögreglustjórinn á Suðurnesjum sagði í hádegisfréttum Bylgjunnar að málið væri litið alvarlegum augum og að það væri komið inn á borð nefndar um eftirlit með lögreglu til rannsóknar. Lögreglan hafði samband við móðurina í morgun og segir hún þann sem hringdi hafa verið mjög almennilegan. 

„En hann hafði engin svör fyrir mig, hver ástæðan var fyrir þessu, af hverju hann en ekki hvíti vinur hans við hliðina á honum. Og af hverju svona harkalegar aðgerðir, ég er líka bara svo reið yfir því og að enginn hafi haft samband við mig. Hann er undir lögaldri og það er enginn sem talar við mig,“ segir hún.

Áður komið fyrir

Þetta er ekki í fyrsta skipti sem lögreglan hefur haft afskipti af drengnum vegna húðlitar. „Þegar það var eitthvað atvik í gangi þá hefur mér verið líkt við einhvern og ég hef farið í yfirheyrslu uppi á lögreglustöð því einhver litaður var að gera eitthvað,“ segir drengurinn. 

Aðspurður hvort hann muni geta treyst lögreglunni eftir þetta svarar hann játandi. „Lögreglan er búin að gera frábæra hluti, þetta er gott fólk en maður á ekki að þurfa að hugsa um svona hluti þegar maður labbar framhjá lögreglunni.“ Mæðginin hyggjast leita réttar síns vegna málsins.