Mark í fyrsta leik hjá Ás­dísi Karen

Ásdís Karen gekk til liðs við Lilleström í vetur frá Val en Lilleström endaði í þriðja sæti norsku deildarinnar á síðustu leiktíð. Brann hefur verið að gera góða hluti í Meistaradeild Evrópu en Natasha Anasi Erlingsdóttir er á mála hjá liðinu.

Ásdís Karen byrjaði í fresmstu víglínu hjá Lilleström í dag og hún var ekki lengi að koma sér á blað. Hún skoraði fyrsta mark liðsins á 3. mínútu leiksins. Lilleström bætti öðru marki við á 26. mínútu en lið Brann tókst að jafna metin í 2-2 með tveimur mörkum snemma í síðari hálfleiknum.

Það var hins vegar heimalið Lilleström sem tókst að tryggja sér sigurinn. Liðið náði forystu strax í kjölfar jöfnunarmarksins og innsiglaði sigurinn með marki skömmu fyrir leikslok. Lokatölur 4-2 og góð byrjun Lilleström í norsku deildinni staðreynd.

Ásdís Karen lék allan leikinn í liði Lilleström en Natasha Anasi sat á bekknum hjá Brann.