Maður hand­tekinn tvisvar í nótt fyrir sama brot

Maðurinn fékk þá maka sinn til að sækja sig á lögreglustöðina en stuttu síðar var sami ökumaður stöðvaður af annarri lögregluáhöfn tveimur götum frá lögreglustöðinni við Hverfisgötu vegna gruns um akstur undir áhrifum. 

Ökumaðurinn var því handtekinn á nýjan leik en í dagbók lögreglunnar á höfuðborgarsvæðinu kemur fram að þetta hafi verið í þriðja sinn sem þessi tiltekni ökumaður er handtekinn vegna gruns um akstur undir áhrifum og fyrir akstur sviptur ökuréttindum. Ökumaðurinn var laus úr haldi lögreglu að sýnatöku lokinni.

Óvíst hvor ók bifreiðinni

Einnig kemur fram í dagbók lögreglu að tveir menn hafi verið handteknir vegna gruns um akstur undir áhrifum en óvíst er hvor sat við stýrið.

„Tilkynnt um umferðaróhapp þar sem bifreið er ekið á umferðarskilti. Tilkynnandi sér aðilana reyna að losa bifreiðina og segir þá augljóslega undir áhrifum. Lögregla fer á vettvang, báðir aðilar handteknir, grunaðir um ölvunarakstur. 

Þeir fluttur á lögreglustöð þar sem blóðsýni verða dregin úr þeim og þeir síðan vistaðir í fangaklefa þar til hægt verður að yfirheyra þá þar sem þeir voru ekki staðnir að akstrinum. Það er því enn óljóst hvor aðilinn ók bifreiðinni,“ segir í dagbók lögreglu.

Alvarlegt umferðarslys í Breiðholti

Tveggja bifreiða árekstur varð í Breiðholti í nótt þar sem fimm til sex einstaklingar hlutu háorkuáverka.  

Lögreglan fór á vettvang og lokaði fyrir umferð til að rannsaka málið. Að svo stöddu er ástand farþega og ökumanna óþekkt.