Neymar: Ég vildi gefast upp

„Það voru dagar þar sem ég vildi gefast upp,“ viðurkenndi Neymar. Hann sleit krossband og skaðaði liðþófann í október á síðasta ári í leik með brasilíska landsliðinu. ESPN segir frá.

Hann hefur því ekkert spilað með liði sínu Al Hilal í næstum því tíu mánuði.

Hinn 32 ára gamli Neymar opnaði sig á samfélagsamiðlum en reyndi líka að sýna fram á þrautseigju sína.

„Eftir að ég varð fyrir þessum meiðslum þá voru nokkrir dagar mjög erfiðir. Það voru því dagar þar sem ég vildi gefast upp. Það er mjög erfitt að þurfa að ganga í gegnum þetta,“ sagði Neymar.

„En ég er stríðsmaður og hætti ekki fyrr en ég fæ það sem ég vil. Guð er minn styrkur og mitt virki. Við munum halda áfram að berjast á hverjum degi,“ sagði Neymar.

Neymar náði aðeins að leik fimm leiki fyrir Al Hilal áður en hann meiddist. Hann skrifaði undir tveggja ára samning við sádí-arabíska félagið í ágúst 2023.

Fyrir þessi tvö ár var Neymar öruggur með þrjú hundruð milljón dollara eða meira en 42 milljarða íslenskra króna.

Jorge Jesus, stjóri Al Hilal, var að vonast eftir því að Neymar myndi snúa aftur í september.