Sló 24 ára met Kára Steins en fær það ekki skráð

Sindri Karl Sigurjónsson kom langfyrstur í mark í flokki 15 ára og yngri í 10 kílómetra hlaupinu á laugardaginn, eða á 35:49 mínútum. Það er 17 sekúndum betri tími en met Kára Steins frá því fyrir 24 árum, en metið stendur enn.

Það er vegna þess að ekki var sótt um vottun fyrir 10 kílómetra hlaupið, heldur aðeins fyrir keppnina í hálfmaraþoni og maraþoni sem þó ríkti óvissa um lengi vel.

„Algjörlega ákvörðun hlaupahaldara“

„Það er algjörlega ákvörðun hlaupahaldara hvort sóst er eftir vottun Frjálsíþróttasambandsins,“ segir Friðleifur Friðleifsson, formaður langhlaupanefndar Frjálsíþróttasambands Íslands, sem var gestur í Bítinu á Bylgjunni í morgun.

Aðstandendur Reykjavíkurmaraþonsins spöruðu sér, samkvæmt svörum Friðleifs, tæplega 900.000 krónur með því að fá ekki vottun á 10 kílómetra hlaupinu. Í vottuninni felst nefnilega að rukkað er 150 króna gjald fyrir hvern hlaupara sem fær tíma skráðan í afrekaskrá FRÍ, auk um 40.000 króna grunnkostnaðar.

„Með þessari vottun Frjálsíþróttasambandsins er í fyrsta lagi verið að segja fólki að hlaup eru íþróttaviðburður. Í annan stað er verið að leggja út brautina með viðurkenndum mælingamanni, gera kröfu um ákveðinn aðbúnað fyrir hlaupara, jafnvel sjúkrahjálp í marki, öryggisþætti, og stóra hlutverkið er að það kemur einhver og dæmir hlaupið.

Í þessu tilfelli er enginn að dæma 10 kílómetra hlaupið í Reykjavíkurmaraþoni Íslandsbanka,“ segir Friðleifur og bætir við að mikilvægt sé að halda utan um árangur í hlaupum í afrekaskrá, og að þar sé ekki verið að bera saman ólíka hluti.

Nánast öll götuhlaup fengið vottun

„Við viljum að þessir viðburðir séu framkvæmdir á ákveðinn hátt, og með dómara. Það er þannig í íþróttasamfélaginu öllu, að árangur verður sjaldnast viðurkenndur nema með dómara. Ástæðan fyrir því að 10 kílómetra hlaupið var ekki vottað, en hinar vegalengdirnar voru það, er spurning fyrir hlaupahaldara.

Við höfum lagt mikla áherslu á að fá sem flest hlaup inn í vottunarkerfi sambandsins. Ég held að ég geti fullyrt að nánast öll götuhlaup hafi farið inn í þetta vottunarferli og það eru til dæmis fram undan þrjú götuhlaup á næstunni sem eru öll vottuð. Ég hvet þennan unga strák úr Borgarnesi til að mæta þar og hlaða aftur í byssurnar og láta vaða,“ segir Friðleifur.

Gjaldið sé rukkað frá hlaupurum

Spurður út í kostnaðinn sem fylgir því að fá vottun svarar Friðleifur því að hugsunin sé sú að hlauparar greiði sjálfir fyrir að fá tíma sinn skráðan í afrekaskrá:

„Vottunin fer þannig fram að hlaupið sjálft, með dómara og því umstangi sem því fylgir, er sirka 40.000 krónur. Síðan er tekið gjald fyrir hvern skráðan lokatíma sem fer inn í afrekaskrána. Það gjald er 150 krónur fyrir hvern hlaupara. Þetta gjald rukka hlaupahaldarar hlauparana um. Frjálsíþróttasambandið ætlast sem sagt til að hlauparar greiði þetta gjald, og það er þá hlaupahaldarans að koma þessu gjaldi inn í sitt þátttökugjald.“