Ein­kunnir Ís­lands: Orri öflugastur í sigrinum á Svart­fjalla­landi

Hákon Rafn Valdimarsson, markvörður [8]

Ekki út á neitt við hans leik að setja. Hélt markinu hreinu. Átti nokkrar góðar vörslur en þurfti ekkert að hafa mjög mikið fyrir hlutunum.

Alfons Sampsted, hægri bakvörður [6]

Traustur varnarlega og hélt sóknum upp vinstri væng Svartfellinga í algjöru lágmarki. Skilaði litlu sóknarframlagi og var feiminn við að fara utan á vængmanninn.

Hjörtur Hermannsson, miðvörður [7]

Kom sér fyrir fast skot og leysti þannig vel úr fyrstu vandræðunum sem liðið lenti í. Fylgdi því eftir með öruggri frammistöðu allan leikinn. Svartfellingar ógnuðu ekki mjög mikið en létu alveg hafa svolítið fyrir sér.

Daníel Leó Grétarsson, miðvörður [7]

Myndaði öruggt miðvarðapar með Hirti. Saman leystu þeir allt sem að íslenska markinu bar. Ekkert út á að setja en engar marklínubjarganir eða stórkostlegar tæklingar til að segja frá heldur.

Logi Tómasson, vinstri bakvörður [6]

Duglegri í sóknarleiknum en Alfons. Átti ekki marga eftirminnilega spretti samt. En líkt og öll íslenska vörnin, öruggur og hélt hreinu,  yfir því verður ekki kvartað. 

Stefán Teitur Þórðarsson, miðjumaður [8]

Áræðinn og öflugur á miðjunni. Framsækinn og oft með góð hlaup upp völlinn þegar plássið gafst. Gefur góð löng innköst, einkennismerki íslenska landsliðsins og gríðar mikilvægur hluti af leik liðsins. Beið aftastur í hornspyrnum og stöðvaði, að minnsta kosti eina, hættulega skyndisókn.

Jóhann Berg Guðmundsson, miðjumaður [8]

Mikilvægasti leikmaður liðsins, fyrirliðinn og drifkrafturinn, eilíft áreiðanlegur. Frábær hornspyrna á Orra Stein sem skilaði fyrra markinu.

Gylfi Þór Sigurðsson, miðjumaður [8]

Hefur engu gleymt. Flott önnur endurkoma í landsliðið eftir árs fjarveru. Stýrði öllu spili og dreifði boltanum vel. Negldi góðri hornspyrnu inn á Jón Dag áður en þeir fóru af velli.

Mikael Neville Anderson, hægri kantmaður [6]

Tókst í upphafi leiks, með smá stælum, að reita manninn sem var að dekka hann til reiði. Alltaf góð taktík. Annars ágætis leikur hjá honum. Ekkert út á dugnaðinn að setja en úrslitasendingar fóru oft úrskeiðis.

Jón Dagur Þorsteinsson, vinstri kantmaður [8]

Hefur alltaf liðið vel í landsliðstreyjunni og á því varð engin breyting í kvöld. Fantagóð frammistaða og skoraði frábært mark. Óhræddur við taka menn á og ógnar sífellt en skilar alltaf varnarvinnu þegar þess þarf.

Orri Steinn Óskarsson, framherji og maður leiksins [9]

Langhættulegasti maður liðsins í leiknum. Alltaf leitað að honum þegar Ísland sótti upp völlinn. Þvílíkur stökkkraftur sem hann sýndi í markinu. Gott hlaup, tróndi yfir alla og stýrði boltanum í netið af mikilli snilld. Illviðráðanlegur augljóslega. Alltaf hægt að finna hann í lappir og batta boltann. Ógnaði með góðum hlaupum inn á teiginn. Maður leiksins í kvöld. 

Varamenn

Arnór Sigurðsson [7] kom inn á fyrir Jón Dag Þorsteinsson á 65. mínútu.

Fín skipting. Jón Dagur skilaði gríðarlegri vinnslu og gott að fá ferskar lappir inn á þessum tímapunkti. 

Willum Þór Willumsson [6] kom inn á fyrir Mikael Neville Anderson á 77. mínútu.

Hefði hæglega getað komist á blað. Fékk frábært færi einn gegn markmanni en klikkaði.

Ísak Bergmann Jóhannesson kom inn á fyrir Orra Stein Óskarsson á 87. Mínútu

Spilaði of lítið til að fá einkunn.