Í Bíó Paradís var mættur forseti Íslands Halla Tómasdóttir. Hún ávarpaði viðskiptavini Íslandsbanka og sagði nokkur orð um mikilvægi Vigdísar í sögu þjóðar og heims. Eins og fram hefur komið verður fyrsti þáttur frumsýndur í Ríkisútvarpinu á nýársdag en alls verða þættirnir fjórir talsins.
Þættirnir eru úr smiðju Rakelar Garðarsdóttur og Ágústu M. Ólafsdóttur sem framleiða fyrir Vesturport. Nína Dögg Filippusdóttir fer með aðalhlutverkið sem Vigdís sjálf en Elín Hall, tónlistarkona og leikari, leikur Vigdísi á hennar yngri árum.
Björn Hlynur Haraldsson og Tinna Hrafnsdóttir leikstýra en þættirnir fjalla um líf Vigdísar fram að forsetakosningunum 1980 þar sem hún bar sigur úr býtum og var fyrst kvenna kosinn forseti á heimsvísu.
Íslandsbanki hélt sérstaka forsýningu á nýrri leikinni þáttaröð um líf Vigdísar Finnbogadóttur, fyrrum forseta, en bankinn er bakhjarl þáttanna. Fyrsti þátturinn var sýndur fyrir tvö hundruð gestum og mikil ánægja ríkti meðal gesta, að sögn forsvarsmanna bankans.
„Við höfum verið í góðu samstarfi við Vigdísi í gegnum tíðina og héldum meðal annars sýningu á kjólunum hennar í kringum Hönnunarmars. Hún er einstök fyrirmynd og við erum mjög stolt af því að vera bakhjarlar þessa glæsilega verkefnis sem er mikilvæg heimild um sögu fyrsta kvenforseta heims,“ segir Edda Hermannsdóttir upplýsingafulltrúi bankans.
Rakel Garðarsdóttir segir sögu Vigdísar vera sigursögu. „Saga um von og um að elta draumana sína. Hún er ein mikilvægasta saga okkar samtíma að mínu mati og var það ástæða þess að okkur langaði að segja þessa sögu. Það er langt ferli að baki einnar svona sjónvarpsseríu og þar skiptir samvinna öllu máli. Við erum svo lánsöm að allir þeir sem komu að verkinu eru að mínu mati þeir flinkustu í bransanum - og ómetanlegt að fá stuðning frá sjóðum og fyrirtækjum. Saman erum við alltaf betri.“
Frá forsýningu í Vinnustofu Kjarvals fyrir Vesturport
