„Græna gímaldið“ minni helst á braggamálið og á­byrgðin liggi hjá borgar­stjóra

„Þetta er eitthvað stærsta klúður sem við höfum verið að fást við,“ sagði Hildur í Bítinu á Bylgjunni í morgun. Mikið hefur verið rætt og ritað um byggingu stórrar vöruskemmu við Álfabakka 2 sem liggur afar nálægt fjölbýlishúsi við Árskóga og skyggir verulega á íbúðir. Málið verður fyrsta mál á dagskrá borgarstjórnarfundar í hádeginu í dag en Sjálfstæðismenn í borginni hyggjast þar leggja fram tillögu um að innri endurskoðun taki stjórnsýslu málsins til rannsóknar.

Hildur segist heyra ríka kröfu íbúa í Árskógum, og líka íbúum í Breiðholti almennt, um að skemman verði rifin. „Þeim er bara mjög misboðið yfir þessu máli og þessari furðulegu atburðarás og ég get að mörgu leyti tekið undir þær tilfinningar, að maður sé verulega ósáttur við vinnubrögðin í þessu máli. Vegna þess að ég sem kjörinn fulltrúi, sitjandi í skipulagsráði, fékk ekki tækifæri til að átta mig á því hvers konar uppbygging væri að fara að eiga sér þarna stað og taka afstöðu til hennar,“ segir Hildur.

Málið sé agalegt frá a-ö. „Þetta er auðvitað fyrst og fremst alvega agalegt fyrir íbúana sem eru með þetta græna gímald fyrir augunum á hverjum degi á heimili sínu.“

Hildur var spurð hvort það væri raunhæft að láta rífa húsið, án afleiðinga. „Það myndi hafa auðvitað verulegann kostnað í för með sér fyrir borgina, ég myndi telja að borgin yrði bótaskyld gagnvart þeim aðila sem byggði þetta hús og á það,“ svaraði Hildur.

Lögmaður sem gætir hagsmuna Búseta segir í samtali við Morgunblaðið í dag að leiða megi rök að ann­mark­arn­ir hafi verið við veit­ingu bygg­ing­ar­leyf­is­ sem geri það að verkum að borginni sé heimilt að afturkalla leyfið á grundvelli stjórnsýslulaga.

Hildur segist ekki geta séð annað en að ábyrgðin sé alltaf hjá borginni sem ber að fara yfir gögn og veita leyfið. „Ég tek undir að það er erfitt að sjá að starfsemin sem á að fara fram í húsinu rúmist innan skipulags,“ segir Hildur.

Alltaf kostnaðarsamt fyrir borgina óháð niðurstöðu

Það hafi verið vendipunktur í málinu þegar lóðinni var úthlutað sumarið 2023. „Þá kemur mjög skýrt fram að þetta sé verslunar og þjónustulóð. Það var ekki hægt að upplýsa okkur í borgarráði um það hvaða starfsemi myndi fara þarna fram, það var ennþá trúnaður um það. Núna sjáum við að þarna á að vera kjötvinnsla og ég hef velt því upp hvort að starfsemi af þeim toga eigi ekki miklu frekar heima á athafnasvæði, til dæmis við höfn eða eitthvað slíkt,“ segir Hildur.

Það eigi að hennar mati ekki aðeins við um kjötvinnsluna heldur fyrirhugaða starfsemi húsnæðisins almennt, vöruhús og þess háttar sem tekur við vörum öllum tímum sólarhrings með tilheyrandi hávaðamengun fyrir íbúa í nágrenninu. Þá segist Hildur einnig finna til með atvinnurekendum sem margir hafi átt erfitt með að fá lóðir í Reykjavík undir sína starfsemi, en fái í þessu tilfelli á sig mjög neikvæða umræðu um sína starfsemi.

Hildur segist hafa skilning á kergju íbúa og gagnrýnir málflutning meirihlutans í borginni í málinu. Það sé að hennar mati ljóst, að málið geti dregið dilk á eftir sér og reynst gríðalega kostnaðarsamt fyrir borgina. Aðspurð segir hún að það gæti jafnvel kostað einhverja milljarða ef til þess kemur að byggingin verði rifin eða færð annað, enda sjái hún ekki annað en að borgin muni þurfa að standa straum af öllum tilheyrandi kostnaði við það.

„Sama hver lausnin verður að þá hefur hún alltaf einhvern kostnað í för með sér fyrir borgina,“ segir Hildur.

„Sérkennileg stjórnsýsla“ á skrifstofu borgarstjóra

„Það sérkennilega við þetta mál er nefnilega það að þegar lóðinni er úthlutað þarna sumarið 2023 þá er ákveðinn vendipunktur í málinu vegna þess að í framhaldinu fáum við í skipulagsráði engar upplýsingar um framgang málsins. Það sem gerist er að skrifstofa borgarstjóra tekur málið yfir. Það er óvenjulegt,“ segir Hildur.

Teikningarnar hafi komið inn á skrifstofu borgarstjóra þar sem starfrækt sé Athafnaborgin svokallaða, þar sem lóðum er úthlutað og atvinnuuppbygging oft skipulögð á þeim vettvangi. Það sé síðan byggingarfulltrúi sem veitir leyfið sem slíkt. Hildur segist hafa fengið upplýsingar um að samskipti hafi verið við skrifstofu borgarstjóra og upplýsingar veittar þangað um hvernig þetta myndi liggja.

„Okkur finnst þetta auðvitað mjög sérkennileg stjórnsýsla,“ segir Hildur. Af þessum sökum telur Hildur borgarstjóra bera ákveðna ábyrgð í málinu.

„Mér hefði þótt eðlilegt að borgarstjóri hefði bara mætt í kaffi til þessara íbúa og borið þetta allt saman augum sjálfur. Og mér hefur fundist ákveðin hortugheit í þessu máli og mörgum öðrum sem koma upp gagnvart íbúum. Það gerist oft hjá fólki sem hefur verið við völd mjög lengi, að það fjarlægir sig fólkinu,“ segir Hildur. Hún sé hissa að nýr borgarstjóri, Einar Þorsteinsson, hafi ekki „tæklað þetta mál öðruvísi.“

Bæði Einar Þorsteinsson borgarstjóri og Dóra Björt Guðjónsdóttir, formaður skipulagsráðs, hafa sagt málið hafa komið þeim nokkuð í opna skjöldu og þau hafi ekki áttað sig á hvernig byggingin myndi líta út. Dóra Björt þáði ekki boð um að koma í viðtal um málið á Bítinu í morgun. 

Málið verður til umræðu á fundi borgarstjórnar í hádeginu í dag. Þar muni borgarstjórnarflokkur Sjálfstæðisflokksins leggja fram tillögu um að innri endurskoðun borgarinnar fari ofan í saumana á málinu og geri stjórnsýsluúttekt á málinu.

„Það þarf auðvitað að skoða þetta af því þetta má ekki endurtaka sig,“ segir Hildur.