Tindastóll vann sterkan átta stiga sigur er liðið heimsótti Stjörnuna í toppslag Bónus-deildar karla í körfubolta í kvöld, 82-90.
Stjörnustemning í upphafi leiks
Stjörnumenn byrjuðu af gríðarlegum krafti, Orri Gunnarsson setti fyrstu stigin með þriggja stiga skoti og Shaquille Rombley tróð svo af alefli í næstu sókn. Stúkan tók strax við sér og stemningin var öll Stjörnumegin fyrstu mínúturnar.
Á voru meðan Stólarnir í vandræðum sóknarlega en gátu sem betur fer treyst á Adomas Drungilas, sem setti fyrstu átta stigin, áður en aðrir leikmenn tóku við sér.
Stólarnir stóðu varnirnar vel
Eftir afar öfluga byrjun fjaraði hins vegar fljótt út hjá Stjörnunni og liðið lenti undir í baráttunni.
Tindastóll nýtti tækifærið og tók eins stigs forystu áður en fyrsta leikhluta lauk. Stólarnir héldu svo áfram að keyra á Stjörnumenn og stækkuðu forystuna í öðrum leikhluta, staðan 37-46 þegar flautað var til hálfleiks.
Stólarnir héldu áfram að standa öfluga vörn í seinni hálfleik, Stjarnan fann engar lausnir og stemningin í húsinu dvínaði með hverri mínútunni sem Stólarnir færðust nær sigrinum.
Stutt áhlaup heimamanna undir lokin
Það var ekki fyrr en í fjórða leikhluta sem Stjörnumenn sýndu aftur almennilega að þeim langaði til að vinna leikinn. Shaquille Rombley og Hilmar Smári kveiktu í húsinu með troðslu og þriggja stiga skoti, Adomas Drungilas var svo vikið af velli eftir fimmtu villuna í næstu sókn Tindastóls.
Stjarnan minnkaði muninn niður í sex stig í næstu sókn og virtist ætla að snúa leiknum við.
Sigtryggur stakk rýtingnum
Það gerðist hins vegar ekki, Sigtryggur Arnar svaraði fyrir Stólana, setti niður gríðarmikilvægan þrist sem breikkaði bilið í átta stig og svo gott sem tryggði sigurinn.
Síðustu tvær mínútur leiksins settu Stjörnumenn snögg skot og sendu Stólana á línuna, en tókst ekki að minnka muninn. Lokatölur 82-90.
Staðan í deildinni
Tindastóll tók toppsætið með þessum sigri. Liðin eru jöfn með 26 stig en Tindastóll hefur unnið báðar innbyrðis viðureignirnar. Njarðvík er sex stigum neðar en á leik til góða.
Leikurinn fór fram fyrr en aðrir í sautjándu umferð vegna anna Benedikt Guðmundssyni, þjálfara Tindastóls, með kvennalandsliði Íslands.
Stemning og umgjörð
Vel haldið á spöðunum hjá Stjörnunni. Hitað upp á Dúllubar frá klukkan fimm og stuðningsmönnum beggja liða boðið. Úrslitaleikurinn á HM í handbolta og enski boltinn á skjánum, hljómsveitin Úlfur Úlfur spilaði svo og keyrði upp stemninguna, sem skilaði sér sannarlega í hús.
Hvað er framundan?
Bæði lið fá nú fínt frí, þar til fimmtudagsins 13. febrúar þegar Stjarnan heimsækir Hött og Tindastóll tekur á móti Þór Þorlákshöfn. Fimm umferðir eru eftir óspilaðar í deildinni.
Tindastóll á eftir leiki við Þór Þorlákshöfn (H), Álftanes (Ú), Keflavík (H), Njarðvík (Ú) og Val (H).
Stjarnan á eftir leiki við Hött (Ú), Þór Þorlákshöfn (Ú), Álftanes (H), Keflavík (Ú) og Njarðvík (H).
Viðtöl
„Stólarnir kepptu harðar en við hér í dag“
„Ósáttur með að tapa og bara pirraður yfir því,“ sagði Baldur Þór Ragnarsson, þjálfari Stjörnunnar, strax eftir leik.
Stjörnumenn byrjuðu sterkt. Hvers vegna náðuð þið ekki að halda því áfram?
„Það er bara góð spurning. Við náðum ekki að halda því og Stólarnir kepptu harðar en við hér í dag. Við þurfum að vera betri.“
Ægir Þór lét lítið að sér kveða í kvöld og sat á bekknum nánast allan fjórða leikhlutann.
„Hann er að díla við þennan fót, ef þú horfir á leikinn þá er hann haltrandi þarna í seinni hálfleik. Það er bara ástæðan.“
Tindastóll tekur toppsætið af Stjörnunni með þessum sigri.
Hversu miklu máli skiptir það, hvort liðið endar ofar?
„Kemur bara í ljós,“ sagði Baldur að lokum.
