Þak styrkja til turnanna tveggja lækkað

Í samráðsgáttinni segir að Logi Einarsson, menningar-, nýsköpunar- og háskólaráðherra, leggi til í drögum að frumvarpi til breytinga á fjölmiðlalögum að stuðningur til einkarekinna fjölmiðla verði framlengdur til eins árs.

Þriggja prósentustiga lækkun

Sú breyting sé gerð frá fyrri lögum að hlutfall stuðnings til hvers umsækjanda geti samkvæmt frumvarpinu ekki orðið hærri en sem nemur 22 prósent af fjárveitingu til verkefnisins en áður hafi verið miðað við 25 prósent.

Í fyrra var tæplega 551 milljón króna úthlutað til 27 fjölmiðla. Langmest fengu Árvakur, útgáfufélag Morgunblaðsins og tengdra miðla, og Sýn, útgáfufélag Stöðvar 2, Vísis og Bylgjunnar, 124 milljónir króna hvort.

Breytingin hefur takmörkuð áhrif

Sem áður segir verður hámarksstyrkur lækkaður úr fjórðungi heildarúthlutunar í 22 prósent. Breytingin ætti þó ekki að hafa mikil áhrif á styrkveitingar, enda hlaut enginn fjölmiðill fjórðung styrkjanna í sinn hlut. Árvakur og Sýn hlutu 22,49 prósent heildarúthlutunar hvort. 

Því myndi lækkun aðeins nema tæplega hálfri prósentu, að því gefnu að aðrar breytur haldist óbreyttar.

Heildarendurskoðun hafin

Í samráðsgáttinni segir að vinna við endurskoðun ákvæða kafla fjölmiðlalaga um styrki til einkarekinna fjölmiðla sé þegar hafin og frumvarp sem festir í sessi stuðning til einkarekinna fjölmiðla verði lagt fram á haustþingi. 

„Af þeim sökum er gildistími kaflans einungis til næstu áramóta. Var það metið sem svo að vinna við endurskoðun væri ekki komin á það stig að unnt væri að leggja fram frumvarp með endurskoðuðum ákvæðum á vorþingi, en til þess að tryggja stuðning við fjölmiðla á árinu 2025 þykir nauðsynlegt að taka upp ákvæði um stuðning til einkarekinna fjölmiðla sem gilda meðan verið er að ljúka vinnu við endurskoðun stuðningsins. Áætlað er að til úthlutunar á árinu verði sambærileg upphæð og hefur verið.“