Er betra fyrir Ís­land að vinna eða tapa?

Það væri líklega sterkur leikur hjá Knattspyrnusambandi Evrópu að sýna með afdráttarlausum hætti að svarið sé auðvitað, alltaf, að betra sé að vinna leiki en að tapa þeim. En er það þannig í Þjóðadeildarumspilinu?

Sterkari mótherjar og hærri upphæðir

Tvennt er að minnsta kosti á hreinu. Það er betra fyrir Ísland að vinna Kósovó og spila áfram í B-deild Þjóðadeildarinnar í stað C upp á það að gera að fá leiki við sterkari mótherja. Það hlýtur að gagnast Arnari Gunnlaugssyni betur, og vera skemmtilegra fyrir alla, að fá leiki við Svíþjóð og Sviss á næsta ári frekar en við Kýpur og Færeyjar.

Svo eru það peningarnir. Það að spila í B-deild tryggir KSÍ hærra lágmarksverðlaunafé en að spila í C-deild (sirka 220 milljónir króna í stað 165 milljóna á síðustu leiktíð). Það flækir þó málið hvað þetta varðar að sigurvegarar riðla í C-deild hafa fengið bónus og þar með hærri upphæð samtals en lið sem endar í 2., 3. eða 4. sæti síns riðils í B-deild.

Leiðin inn á stórmót

Vandamálið við Þjóðadeildina er að virðingin fyrir henni er ekki sú sama og fyrir EM og HM. Þess vegna horfa margir á hana sem keppni sem fyrst og fremst nýtist sem varaleið inn á stórmótin. Þetta þekkja Íslendingar eftir að hafa komist í umspil um sæti á síðustu tveimur Evrópumótum út frá Þjóðadeildinni.

Og ef við ætlum einungis að horfa á Þjóðadeildina sem hjálp til að komast á EM þá er bara mjög erfitt að svara því hvort sé betra að vera í B- eða C-deild.

Það er ekki búið að gefa út hvernig næsta leiktíð Þjóðadeildar mun hafa áhrif á undankeppni EM 2028 en það hefur verið þannig að árangur í Þjóðadeildinni getur gefið leið í umspil um stórmótasæti.

Þægilegra fyrir Georgíu en Ísland?

Ef við miðum við síðasta EM þá komst til dæmis Georgía á mótið í gegnum C-deildar umspil úr Þjóðadeild sem í voru einnig Lúxemborg, Kasakstan og Grikklandi. 

Ísland fór í B-umspilið með Ísrael, Bosníu og Úkraínu en hefði allt eins getað endað í umspili með Póllandi og Wales úr A-deild. Hefði þá ekki verið betra að vera í sporum Georgíu?

Hefði ekki líka verið betra að spila í C-deild á þeirri leiktíð Þjóðadeildarinnar sem nú er að ljúka? Aðeins sigurvegarar riðla eiga möguleika á að komast í umspil um HM-sæti út frá árangri í Þjóðadeildinni, svo það er þannig séð betra að hafa unnið riðil í C-deild en að enda í 2. sæti riðils í A-deild. Meira að segja San Marínó er nær því en Ísland að komast í HM-umspilið gegnum Þjóðadeildina.

Á móti kemur að töp og sigrar hafa áhrif á stöðu á styrkleikalistum, svo að hver sigur hjálpar Íslandi að vera í efri styrkleikaflokki þegar dregið er í hinar raunverulegu undankeppnir stórmóta. Liðið var til að mynda í þriðja flokki af fimm þegar dregið var í undankeppni HM en Kósovó í þeim fjórða.

Á stórmót án þróunaraðstoðar

Er þá auðvelt að svara því hvort betra sé fyrir Ísland að vinna einvígið við Kósovó? Ekki svo en það hljóta þó allir að vonast eftir skýrum merkjum um að bjartir tímar bíði undir stjórn Arnars og enginn ætti að þurfa að velkjast í vafa um að markmið hans, Orra fyrirliða og hinna strákanna í íslenska liðinu sé skýrt; góð frammistaða og sigur. Að sýna að þetta sé lið sem geti komist á stórmót algjörlega án þróunaraðstoðar Þjóðadeildarinnar.

Fyrri leikur Kósovó og Íslands hefst klukkan 19:45 í kvöld og sá seinni, heimaleikur Íslands, er á Spáni á sunnudag klukkan 17. Báðir leikir eru í beinni útsendingu og opinni dagskrá á Stöð 2 Sport.