Hótar að inn­lima sí­fellt stærri hluta Gasa þar til gíslum verði sleppt

Ísraelar sendu á dögunum hermenn inn á Gasaströndina á nýjan leik og hófu umfangsmiklar loftárásir á svæðið, sem hefur þegar orðið verulega illa úti vegna margra mánaða árása og átaka.

Nærri því sex hundruð manns liggja í valnum frá því árásir Ísraela hófust aftur í vikunni, samkvæmt heilbrigðisyfirvöldum á Gasa, sem stýrt er af Hamas-samtökunum. Talskona UNICEF sagði að frá því á þriðjudaginn hefðu rúmlega tvö hundruð börn dáið í árásum Ísraela.

Áður en vopnahléið tók gildi í janúar höfðu rúmlega 48 þúsund Palestínumenn fallið, samkvæmt áðurnefndu heilbrigðisráðuneyti, sem gerir ekki greinarmun milli borgara og vígamanna.

Sjá einnig: Ísraels­her tekur aftur yfir Netzarim-mörkin og lokar þeim

Ummerki eru á lofti um að þessi áfangi hernaðar Ísraela á Gasaströndinni gæti orðið enn harðneskjulegri. Donald Trump, forseti Bandaríkjanna, hefur lýst yfir stuðningi við aðgerðirnar og lagt til að rúmar tvær milljónir íbúa Gasastrandarinnar verði fluttir á brott. Bandaríkjamenn hafa sett enn minni hömlur á Ísraela en gert var í stjórnartíð Joes Biden.

Þar að auki er ríkisstjórn Benjamíns Netanjahú, forsætisráðherra, sterkari en áður, samkvæmt frétt AP fréttaveitunnar, og þar sem færri gíslar eru á Gasa hefur ísraelski herinn meira athafnafrelsi.

Ætla að taka meira og meira land

Katz sendi frá sér yfirlýsingu í morgun þar sem hann sagðist hafa skipað ísraelska hernum að hernema frekara svæði á Gasaströndinni og vísa íbúum á brott þaðan. Þetta myndi halda áfram þar til gíslunum yrði sleppt.

„Svo lengi sem Hamas neitar, munu þeir missa meira og meira land sem bætist við Ísrael,“ sagði í yfirlýsingunni. Hann sagði einnig að umfang aðgerða Ísraela á Gasa myndi aukast og aukast, þar til gíslunum yrði sleppt.

Í frétt Times of Israel segir að Katz hafi einnig sagt að Ísraelar myndu beitta ­íbúa Gasa „hernaðarlegum og borgaralegum þrýstingi“ til að koma í gegn áætlun Trumps um „sjálfviljugan“ brottflutning íbúanna.

Trump hefur talað um Bandaríkin taki yfir stjórn Gasastrandinnar og reisi þar „Rivíeru“ Mið-Austurlanda.  

Ríkisstjórn Trumps hefur ekkert sagt um nýjar árásir Ísraela né það að Ísraelar hafi rift vopnahléssamkomulagi sem Trump hefur stært sig af því að bera ábyrgð á. Ráðamenn í Bandaríkjunum hafa að engu leyti gagnrýnt árásir Ísraela sem sagðar eru hafa banað nokkur hundruð óbreyttum borgurum á undanförnum dögum.

Erindrekar Hvíta hússins gerðu tilraun til að eiga í beinum viðræðum við leiðtoga Hamas um gíslana en hættu vegna þess að Ísraelar brugðust reiðir við.

Leiðtogar Hamas sagt að þeir muni eingöngu sleppa síðustu gíslunum sem þeir halda, sem eru í raun einu spilin sem þeir halda, í skiptum fyrir fleiri palestínskra fanga í halda Ísrael, varanlegt vopnahlé og það að Ísraelar hörfi frá Gasaströndinni.

Þrátt fyrir umfangsmikil mótmæli gegn ríkisstjórn Netanjahús í Ísrael virðist sem staða ríkisstjórnar hans hafi eingöngu styrkst. Með því að hefja nýja innrás á Gasa hefur forsætisráðherrann styrkt ríkisstjórn sína á nýjan leik. Fjarhægri-flokkar hafa stutt ríkisstjórnina, eftir að hafa slitið tengsl við hana á sínum tíma vegna vopnahlésins.

Sjá einnig: Segist ítrekað hafa komið í veg fyrir frið á Gasa

Þá hefur Netanjahú rekið eða bolað úr embætti nokkrum háttsettum embættismönnum sem hafa gagnrýnt framgöngu hans.

Samhliða þessu hefur staða Hamas-samtakanna versnað til muna. Flestir leiðtogar samtakanna liggja í valnum auk þúsunda vígamanna þeirra.

Stuðningur Hamas frá Hezbollah í Líbanon og Sýrlandi og klerkastjórninni í Íran er einnig minni en hann var áður og er talið mjög ólíklegt að þessir aðilar muni reyna að koma Hamas til aðstoðar.

Þá eru Bandaríkjamenn að gera umfangsmiklar árásir á Húta í Jemen, sem hafa einnig skotið eldflaugum að Ísrael og skipum á Rauðahafi.