Fögnuðu grimmt og gætu fengið bann

Leikmennirnir fjórir eru sagðir hafa gengið of langt í fagnaðarlátum liðsins eftir að Antonio Rudiger skoraði úr vítaspyrnunni sem vann einvígið, sem endaði 2-2 eftir tvo leiki og fór í vítaspyrnukeppni.

Liðið fagnaði og dansaði saman fyrir framan áhorfendur Atlético, sem köstuðu drasli úr stúkunni í átt að þeim. Leikmennirnir fjórir brugðust illa við.

Rudiger sást skera háls sinn með handabendingu í átt að stuðningsmönnum Atlético.

Hinir náðust ekki á mynd en Mbappé, Vinícius og Ceballos eru allir sakaðir um að hafa notað óviðeigandi handabendingar í átt að stuðningsmönnum Atlético.

Lög UEFA eru skýr hvað það varðar, að æsa stuðningsmenn andstæðingsins upp með óviðeigandi hætti á að vera beint rautt spjald, en þar sem leikmennirnir voru ekki spjaldaðir af dómara er UEFA með málið til rannsóknar hjá aganefnd.

Svipað mál kom upp á EM á síðasta ári, þar sem Jude Bellingham fékk skilorðsbundið bann fyrir klámfengin fagnaðarlæti. Skilorðsbundið bann gengur þannig fyrir sig að leikmaður er dæmdur í bann, í einn leik í tilfelli Bellingham, en bannið tekur ekki gildi nema leikmaðurinn gerist aftur brotlegur á reglum UEFA.